«Үзе вафат булгач кына аңладым, Диана безнең нәселебезнең бизәге булган икән. Тышкы матурлыгы белән генә түгел, эчке бер яктылыгы, көчле рухлы булуы белән дә», – ди Әнвәр Нургалиев үзенең аянычлы үлеме белән бөтен халыкны тетрәндергән якын туганы Диана Сәфәрова турында. Җырчы «Интертат»ка әлеге кара көн вакыйгаларын сөйләде.

2021 елның 11 маенда Казанның 175нче гимназиясендә бер гаепсез 7 бала һәм 2 укытучының гомере өзелде. «Бер пуля улымның гәүдәсен тишеп үтте, берсе тәнендә калды. Аллаһы Тәгаләнең ярдәме белән 2 улым да бу коточкыч вакыйгалардан соң исән-сау. Ходай аларны тәүфыйклы, иманлы итеп үстерергә насыйп итсен», – дип искә ала ул көннәрне әти кеше.