Ришат Фазлыйәхмәтов беренче никахы аркасында чит илгә ял итәргә бара алмавын әйткән
Концертлар сезоны тәмамлану белән, җырчылар җылы якларга ялга оча башлады. Ришат Төхвәтуллин белән Алия Карачурина Төркия якларыннан кайтып төште. Бу көннәрдә Мөнир Рахмаев белән хатынының да Урта диңгез яр буендагы «кайнар» фотолары бөтен интернетны шартлатты. Рифат Зарипов гаиләсе белән Мисыр пирамидаларын карап йөри. Бәлки, шуларны күрептер, җырчы Ришат Фазлыйәхмәтов та башка илләргә бару, тормыш иптәше «Тәтишка»га диңгез күрсәтү теләге зур булуы хакында пост язган. Ришат әлегә бу хыялны чынга ашыру мөмкин түгел икәнлеген дә әйткән. Беренче никахыннан туган улына зур суммадагы бурычлары җыелу Ришатка җылы якларга юлны яба.
«Тәтишка»ны Төркия яисә башка берәр матур илгә ял итәргә алып барып кайтасы килә дә бит… «Невыездной» булгач, ярамый шул… Үзен генә җибәрмим, урлап калырлар, дип куркам.
Әле шөкер, артык «капризный» түгел үзе. Казансу ярына төшеп йөреп кайтсак та риза булып йөри», – дип язып куйган Ришат социаль челтәрдәге сәхифәсенә.
«Аллаһы боерса, Төркияне генә түгел, кулга-кул тотынышып, бөтен дөньяны урап чыгарбыз әле. Насыйп булсын», – дип тә тынычландырган үзен Ришат.