Бүгенге көндә интернет челтәрендә блогерлар саны артканнан-арта. Аларның аудиториясе һәм җәмәгатьчелек фикеренә тәэсире дә үсә. Шулай да, алар гаммәви мәгълүмат чараларына көндәш була аламы?
Соңгы арада инстаграмда 19 яшьлек шаян татар блогеры Азат Фатыйховны күзәтеп барам. Бизәми һәм арттырмый гына, гап-гади егет тормышын тасвирлый ул. Азат үзенә "Татарин" тәхәллүсен сайлаган, тик блогының күп өлешен русча алып бара. Шулай да киләчәктә үзенә татар милләтен туплау максатын да билгеләп куйган.