«Гаиләдә 74 кеше. Мыж инде без», – ди «Тарихта без эзлебез» гаилә фестивале җиңүчеләре – Балтачтан Гаязовлар гаиләсе. Бәйгедәге 200 еллык күлмәк, 13 буынлык нәсел шәҗәрәсе, гаилә кыйммәтләре һәм Татарстанның иң матур гаиләләре турында – «Интертат» язмасында.

Бәхет, уңыш елмая, насыйп әйбер авызны ертып керә, дигән сүзләр бар халыкта. Минем туганым да, кияүгә чыгарга дип, Саба ЗАГСыннан Мәскәү ЗАГСына барды да куйды. Дулкынлану, бәхет хисләре ярларыннан ташып ага торган вакыйгага чакырдылар яшьләрне.