Авыл хуҗалыгы министрлыгында нәсел маллары өчен җаваплы Ришат Зарипов кулга алынган

Татарстан авыл хуҗалыгы министрлыгының Нәселле терлек идарәсенең элеккеге башлыгы Ришат Зарипов аеруча зур күләмдә мошенниклык өчен кулга алынган, дип хәбәр итә «Татар-информ».

Россия Тикшерү комитеты һәм УБЭП версиясе буенча, Зарипов, идарәнең җитәкчесе булганда, нәселле атлар сатып алу өчен бирелә торган субсидияләрне законнарны бозып биргән. Аннары субсидияләр акчага әйләндерелгән. Эш буенча зыян 17,5 млн сумнан артык исәпләнә. Сүз Казан ипподромына атлар сатып алу турында бара.

Ришат Зарипов 2015 елдан алып 2022 елга кадәр, бүлекчә таркалганчы, Идарә белән җитәкчелек иткән.

Ул гаебен танымаган. Адвокат эшне ябык режимда карауны сораган, ул Зариповның кечкенә улына карата тискәре йогынты башланудан куркуын әйткән, дип яза «Казанферст». Әмма суд эшне ачык режимда караячагын әйткән. Адвокат Зариповны кулга алмауны сораган – аның инде идарәдә эшләмәвен, качарга җыенмавын әйткән. Әмма суд Зариповны 2 айга сак астында калдыру турында карар кабул иткән.