Артур Шабакаев белән Иркәнең сынаулы язмышы турында: «Тормыш дәвам итә»

Җырчы Иркә бик борчулы көннәр кичерә. Аның махсус операциядәге тормыш иптәше Артур, җитди яраланып, госпитальгә эләкте. Иркә исә ирен госпитальгә кайтарган көнне үк аның янәшәсендә булу өчен, Санкт-Петербург шәһәренә очты. Хәзерге вакытта хәрбине операциягә әзерлиләр.

Бу көннәрдә җырчы үзе һәм гаиләсе өчен борчылып торучы кешеләрнең искиткеч күп булуына да инангандыр. Иркәгә җылы сүзләр язып, рухи яктан терәк булырга тырышучылар саны исәпсез-хисапсыз булды, Шабакаевлар гаиләсенә игътибар да көчәйде.

Артур белән Иркәнең 12 еллык мәхәббәт тарихы һәм махсус операция башланган сынаулы еллары турында, Иркәнең социаль челтәрләрдәге постларын һәм әңгәмәләрдә сөйләгән фикерләрен бергә туплап, «Интертат» язма әзерләде.

Кем ул Артур Шабакаев?

Артур Шабакаев – Казан егете. Аның белән өйләнешкәч тә биргән әңгәмәләрендә, Иркә иренең һөнәре буенча дизайнер-архитектор булуын, үзенең шәхси фирмасында эшләвен сөйләгән булган.

Шәһәрдә үскән егет буларак, Артур татарча иркен сөйләшми. Шулай да, Иркәнең тырышлыгы нәтиҗәсендә, өйләнешкәндә бер татарча сүз дә белмәгән Артур бүгенге көндә бөтен әйткәнне дә аңлый, ватып-сындырып булса да, татарча аралаша ала икән.

Хәрби операциягә киткәнче, Артур өйдән дә эшләгән булса кирәк. «Башкорт хуҗабикәсе»нең «Йолдыз белән бер көн» проектында Иркә иренең фатирларындагы зур гына эш кабинеты белән таныштырган иде. Видеокадрларда Артурның хатынын ничек яратканы күренә: хәтта аның кабинетында да тормыш иптәшенең зур-зур фотосурәтләре эленеп тора.

Махсус операция башланып, повестка килгәч, Артур Шабакаев үзенең курку белмәс ир-егет икәнен дәлилләде: танышлыкларын кулланмыйча, чит илгә качучылар рәтенә кушылмыйча, китеп барды.

«Танышларың аша мине калдырырга тырышсаң, мин түбәнсенәчәкмен. Егетләр сугышта була торып, монда тыныч күңел белән яши алмыйм. Кызларым да миңа: «Башка балаларның әтиләре сугышта, ә син ник бармадың?» – диячәк. Шуңа күрә минем карар белән килеш, зинһар. Мин һичшиксез өйгә әйләнеп кайтачакмын, диде», – дип сөйләгән иде Иркә иренең сугышка китәргә карар итүе турында.

Артурның дин юлында булуы да билгеле. Иркәгә концертларда спиртлы эчемлекләр бүләк итсәләр, алар кайту белән чүп чиләгенә китә икән. «Ирем спиртлы эчемлекләрне, гомумән, өйгә кертми. Тамашачы бүләк итә икән, ул аны ача да раковинага түгә, шешәсен чүп чиләгенә ташлый», – дип сөйләгән иде җырчы ире турында.

Махсус операциядән ялга кайтуының берсендә, хәрби Татарстан мөфтие Камил хәзрәт Сәмигуллин белән дә күреште.

Иркә белән Артурның танышу-кавышу тарихы: «Бу минем балаларымның әтисе булса, дип уйлап куйдым»

Артур Иркәдән 4 яшькә кечерәк. Шуңадырмы, җырчы баштарак булачак иренә җитди карамый, очрашып йөргәндә, сүзгә дә еш килешәләр. Бер әңгәмәсендә Иркә Артур белән 8 тапкыр аерылышып-кавышулары хакында әйткән. Ләкин Артурның яратуы көчле, ниятләре җитди булып чыга.

Яшьләр уртак танышларының туенда таныша. Артур туйда шаһит егет була.

«Артурга шунда ук күзем төште. Дус кызыма: «Карале, шаһит егет ничек чибәр», – дидем. Тик шаһит кыз да елмаеп карап утыра моңа. Болар пар түгелме икән, бергә түгелме икән, дип тә уйлыйм. Берзаман елмаеп җибәрде, ул тешләре энҗе сыман ап-ак, тип-тигез. «Ай, матур, бу минем балаларымның әтисе булса», – дип уйлап куйдым.

Килде бит бу яныма, мине биергә чакыра. Биемәдем. «О чем вы, я же Иркә», – минәйтәм. Ә үземнең шундый биисем килә. Ахырдан тагын килгән бу минем янга. «Ичмасам, фотога булса да төшәргә мөмкинме?» – ди. Мин җырларга чыккач, дусты белән «подтанцовкага» чыкты. Соңрак мине интернеттан тапты. Дуслары аңа кызым барлыгын әйткән булганнар инде. «Мин үзем генә түгел», – дим. «Мин барысын да беләм, әйдә, паркта йөреп кайтабыз», – дип чакырды. Икебезгә дә берәр роза алып килгән иде. Шуннан китте инде. Сентябрьдә беренче тапкыр күрештек, декабрьнең бишләрендә әнисе безгә минем кулны сорарга кайтты», – дип сөйли Иркә үзе ире белән танышу тарихы турында.

2012 елның язында Иркә белән Артур шау-шу куптармыйча, тыныч кына никах укыталар. Төрле матбугат чараларында чыккан язмаларга караганда, яшьләрнең бәйрәм тантанасында Иркәнең әти-әнисе, гаиләләре белән 3 абыйсы, кияүнең әнисе (әтисе мәрхүм) һәм якын туганнары гына булган.

Туй мәҗлесе исә «Корстон» күңел ачу үзәгендә шул ук елның җәй аенда узган. Яшьләр бәйрәм тантанасына 70тән артык кунак чакырганнар. Бәйрәмне Иркәнең җыр-моңга гашыйк әти-әнисенең чыгышлары да бизәгән.

2014 елда Иркә тормыш иптәшенә кыз бала бүләк итте. Аңа Әминә дип исем куштылар. Артур белән Иркәнең икенче кызлары Сөембикә 2015 елда дөньяга килде. Иркәнең беренче никахыннан туган кызы Айсылуны да Артур үз баласыдай күреп тәрбияләде. Билгеле булганча, Айсылу Артурга «әти» дип дәшә.

Артур социаль челтәрләрне, интернет дөньясын, гомумән, гаиләләрен чит кешегә күрсәтүләрне бер дә яратмый. Иренең кызларының фотоларын интернетка куярга рөхсәт итмәве, үзенең дә бик тыйнак кеше булуы хакында Иркәнең күп тапкырлар әйткәне бар.

Мобилизация: «Армиядә хезмәт иткән, таза-сау булган егетләр кача, диләр. Алар өчен оят булып китә»

2022 елда, бик күп гаиләләр белән беррәттән, Шабакаевлар гаиләсенә дә сынау килде. Махсус операция башланганның беренче көннәрендә үк мобилизациягә эләгеп, Артур хәрби операциягә китеп барды. Артурны якыннары озаткан көнне хәрби комиссариат янында «Интертат» хәбәрчесе Зилә Мөбәрәкшина да бар иде.

«Повестка 2 көн элек килгән, бу турыда Артур 1 көн узгач кына хәбәр итте. Аллаһы Тәгаләдән «бу хәл безнең белән булмасын иде» дип сораган идем. Балаларга әтисенең төгәл кая киткәнен әйтмәдек, Артур: «Армиядәге кешеләр тегендәрәк китәләр, ә алар урынына кешеләр кирәк. Булышырга кирәк», – дип, матур итеп аңлатты. Артур армиядә диңгез пехотасында хезмәт иткән. «Әйләнеп кайтам», – дип вәгъдә бирде. «Кайтам», – дигәч, ышанып торабыз инде.

Артур белән 10 елдан артык бергә без. Тәмле әйберләр пешердем. Үземнең әни, Артурның әнисе дә килде. «Бәлки, китмәскә берәр җаен табарбыз?» – дигәч тә: «Ир-ат сүзе бер була, хатын, кысылма инде», – диде. Мин дәшмәскә булдым. Безгә көчне Аллаһы Тәгалә бирә. Артур үзе дә намаз укый. Ир кешенең тыныч, көчле булуы менә шундый вакытларда сынала.

Артур безгә борчылырга да, еларга да вакыт бирмәде. Һәрвакыт күңелне күтәрде. Моңсуланмадык. Белгән догаларымны укыйм, балаларыбыз да белгән догаларын укый, хәзрәт тә безне тынычландырды, аның белән дә сөйләштек. Иң үтә торган догалар – хатынныкы һәм балаларыныкы икән. Шуңа күрә без бөтенебез догаларыбызны укып, позитив нотада Артурны көтеп торачакбыз», – дип сөйләгән иде Иркә сайтыбыз хәбәрчесенә военкомат янында

Артур Шабакаев үзе исә китәргә тулысынча әзер булуын сөйләде.

«Сәламәтлегем нык. 1 ел диңгез пехотасында хезмәт иткән идем. Хәрби хезмәткә китү куркыныч түгел. Башым эшли. Ничек җиңел китәсең, шулай ук җиңел әйләнеп кайтасың. Иң мөһиме – артыгы белән геройланмаска, командирны тыңларга кирәк. Акыллы, зирәк командирлар булыр, дип өметләнәм. Аларның әмерен тыңларга, үтәргә кирәк.

Үзем белән медикаментлар, эчке кием, термокиемнәр, төймәле кесә телефоны алдым. Качып китүчеләр турында да ишетәбез. Армиядә хезмәт иткән, таза-сау булган егетләр кача, диләр. Алар өчен оят булып китә. Сәер күренеш», – дип сөйләгән иде.

Хәрби өйрәнүләр төгәлләнгән соң Артурның кайнар ноктага киткән вакытын, үзенең иң борчулы мизгелләрен Иркә сәхифәсендә күрсәтте. Хәрби киемдәге Артур Иркә, туганнары, дуслары белән кочаклашып саубуллаша. Өстән явып торган кар астында, кулын болгап, «Экспо»га таба китеп бара.

«Китте... Монысында инде еракка китте... Артык сүз кирәкмәс бу урында... Исән-имин кайт, Артур. Кызларыбыз белән без сине көн дә көтәчәкбез. Йә Раббым, кайтар егетләребезне» – дип язды Иркә.

Иркә инде 2 елга якын ирен көтә

Иркә ирен өзелеп сагынуы һәм аны ничек көтүе хакында социаль челтәрләрдә бик еш сөйли. Үзе рөхсәт иткән вакытларда махсус операциядәге ире җибәргән видеоларны да күрсәтә. Иркә сүзләренчә, Артур – көчле рухлы кеше. Ул беркайчан да кәефен төшерми, кызларының да шат күңелле булуларын, борчылмауларын тели, тормыш иптәшенә кыр чәчәкләре җыеп, аларны фотога төшереп җибәрә.

«Кайттымы әле?» – дип сорыйсыз. Юк! Әлегә шунда, хәбәре бар. Әнә миңа чәчкәләр җыйган. Кулында чәчәк бәйләме, һәрвакыттагыча елмайган. Рәхмәт, шундый булганың өчен. Без сине бик яратабыз, көтәбез».

«Менә 1 ел да 2 ай вакыт үтеп китте Артурның анда киткәненә. Күнегеп беттек, дисәм – алдармын… Сагынабыз. Без өйдә 4 кыз бер-беребезне тотып торабыз. Мин моңсулансам, алар, бөтен көчләрен куеп, мине ул халәттән чыгарырга тырышалар. Алар кәефсезләнсәләр, мин бөтен игътибарымны аларга юнәлтәм. Без аны нык көтәбез. Нык…

Төрле кызык видеолар төшереп җибәрәбез. Кыскасы, ул – безгә, без аңа бер күңелсезләнергә бирмибез. Тормыш, туктамас елга булып, ага да ага. Минем бер секундка да уйлап караганым булмады, менә шулай булыр да, гомеребездә шундый борылыш булыр, дип. Бу – зарлану түгел, бәлки, үз-үзем белән сөйләшүдер. Күптән язганым юк икән бит.

Сорыйсыз бит «ничек син» дип. Мин әйбәт! Балаларым Аллаһка шөкер. Ирем анда, аның да ярыйсы», – дип язды ул, мәсәлән, түбәндәге видео янында.

Җырчы махсус хәрби операция зонасында булган тормыш иптәшенә булган хисләрен җырга да салды. Артурга багышланган «Өзелмәгән өмет» җыры музыкаль мәйданнарга чыкты, тиздән аның катнашында клип та дөнья күрәчәк.«Сагынуымны җырга салдым. Көтәм… Бик көтәм...» – дип язган җырчы.

Җырда:

Сиңа булган хисләремне җуймам,

Гомер буе яратсам да, туймам.

Өзелмәгән әле соңгы өмет,

Яшим һаман, яшим сине көтеп», – дигән юллар бар.

Артурның ялга кайтуы һәм гаиләнең сагынышып күрешү мизгелләре

Инде 2 ел диярлек хезмәт итү дәверендә Артур берничә тапкыр кыска вакытлы ялга кайтып килде. Артурның ялга кайтуын Иркә тамашачысы, сәхифәсен карап баручыларга да сөенеп хәбәр итеп бара. Иркәнең Артурны кызлары белән бергәләп вокзалдан каршы алган мизгелләре дә, иренең беркемгә әйтмичә сюрприз ясап кайтып кергән вакытлары да булды. Алар барысы да – түбәндәге видеоларда. Аеруча, Артурның мобилизацияләнгәч тә иң беренче тапкыр кайтуы хис-кичерешләргә бай булган иде.

«Ниһаять, бу көн килеп җитте. Ул кайтты! Мин бу көнне ярты ел тилмереп көттем. Иң зур бәхет менә шул инде», – дип язды ул вакытта Иркә.

Артур махсус хәрби операциядән кыска вакытлы ялга кайткан вакытларда гаилә мөмкин кадәр бергә булырга тырыша. Парның репетиция вакытында бергәләп сәхнәдә биегән видеосын халык бик ошаткан иде.

Артур әле быел җәй башында гына да отпускка кайтып килде, кечкенә кызлары Әминә һәм Сөембикәне алып, Сочида ял итеп кайтты. «Кечкенә кызларыбыз ялда. Әтиләре интернетка чыгаруны яратмый. Кайтуын әйтергә, куярга кушмады. Анда мин генә түгел бит, күп кеше шунда, ди. Зинһар өчен, кирәк түгел, ди. Шуңа күрә аерылып торасы килми. Яратмый андый әйберләрне. Артур кайтты.

Балаларны алып, бүгенге көндә алар өчәүләп, рәхәтләнеп, Сочида ял итәләр. Балалар бик канәгать, әтиләре үзе дә бик бәхетле, әмма һәр видео астында шәхси тормышыбызны дөньяга чыгаруны тыярга кушты Артур. Аңлыйм, беләсе килгән кешеләр дә бардыр, шуңа күрә генә әйтеп алдым. Безнең барысы да әйбәт, Аллаһка шөкер», – дип сөйләде җырчы бу хакта социаль челтәрдә.

«Артурдан күңелсез хәбәр бар»

Кызганыч, моңа кадәр ире турында бары тик позитив нотада гына сөйләргә тырышкан Иркәгә бу көннәрдә язылучыларына Артур турында күңелсез хәбәр җиткерергә туры килде. Артур яраланып, Санкт-Петербург шәһәрендәге хәрби госпитальдә дәвалана. Иркә, авыр хәбәрне алу белән үк, ире янына юл тотты. Хәзерге вакытта Артурны җитди операциягә әзерлиләр.

«Җиңел үк дип әйтеп булмый, җитди яра. Иң мөһиме: Артур исән-сау, сөйләшә. Ашады-эчте, аз гына шаярып та алды. Бик көчле рухлы кеше икәнен беләсез. Җиңел булмаган операциягә әзерләнәчәкбез. Аз-маз хәбәргә чыгып торырбыз. Иң мөһиме – ирем исән-сау. Безнең белән булганыгыз өчен бик зур рәхмәт. Тормыш дәвам итә, без алга барабыз. Барысы да искиткеч булачак, амин. Аллаһы Тәгәләгә тапшырдык. Барысы да Ходай кулында», – дип элемтәгә чыкты госпитальдән Иркә.

Артурның тизрәк савыгып, тормыш иптәше һәм балалары янына исән-имин әйләнеп кайтуын телибез.