Татар театры дөньясы-2024: Айдар Җаббаров никахыннан башлап «Алтын битлек»ләргә кадәр

Кичектерелгән мәдәни вакыйга

Иң зур мәдәни вакыйга Камал театрының яңа бинасы булырга тиеш иде. Хәзер инде яңа бинаның ачылу вакыты кичектерелүне вакыйга дип атыйбыз. Бинаның чыннан да гаҗәеп булуына БРИКС саммиты көннәрендә таралган роликтан күреп ышандык. Быел бинаны Татарстан Республикасы Рәисе белән очрашуга эләккән журналистлар да күрә алды.

Татарстанда курчаклар да «академик»

«Әкият» татар дәүләт курчак театрына «академик» исеме бирелде. Хәзер ул «Әкият» татар дәүләт академик курчак театры» дип атала.

Бер Казанда алты «Алтын битлек»

Казанда 3 театр «Алтын битлек» театр премиясе алды: «Әкият» татар дәүләт курчак театры – 3, Камал театры – 2 һәм Кариев театры 1 «Алтын битлек»кә ия.

«Әкият» курчак театры «Алтын битлек»не «Авиатор» спектакле өчен алды (спектакль үзе, аның режиссеры һәм төп рольдәге актеры). Театрның сәнгать җитәкчесе Илгиз Зәйниев һәм театр артисты Дилүс Хуҗахмәтов – «Алтын битлек» премиясе лауреатлары.

Камал театры «Мөһаҗирләр. Болганчык еллар» спектакле өчен алды. Спектакль «елның иң яхшы спектакле» дип танылды. Шул спектакльдәге костюмнар өчен рәссам Марина Марьянич та «Алтын битлек» лауреаты булды.

Кариев театры «Рөстәм маҗаралары» спектакле өчен «Алтын битлек» махсус премиясенә ия булды.

Театрларда кадрлар алмашы

Кариев театрында, Минзәлә театрында директорлар алышты, Түбән Кама һәм Әлмәт театрларына яңа баш режиссерлар куелды.

Кариев театры директоры Луиза Янсуар социаль челтәрләрдәге аккаунты аша 26 апрельдән театр директоры вазифасыннан китәчәген хәбәр итте.

25 августтан Кариев театрына директор булып, моңарчы Минзәлә театрын җитәкләгән Илнур Гайниев килде.

Сабир Өметбаев исемендәге Минзәлә татар дәүләт театрына директор итеп Фаяз Хизбуллин билгеләнде.

Июнь аенда Сәрдәр Тагировский Әлмәт театрының баш режиссеры вазифаларына кереште – театр белән режиссер арасында контракт имзаланды.

«Без инициативалы, талантлы яшьләрне һәрвакыт Татарстанда көтәбез», – дигән иде Татарстанның мәдәният министры Ирада Əюпова Сәрдәрнең Татарстанда эшләячәген хәбәр иткәндә.

Сентябрь аенда Туфан Миңнуллин исемендәге Түбән Кама татар дәүләт театрына баш режиссер билгеләнде. Бу вазифа Лилия Әхмәтовага тапшырылды. Театр директоры Рөстәм Галиев, «Гөргөри кызын бирә» спектакле белән театрның яңа сезоны ачылганнан соң, тамашачыга һәм коллективка Лилия Әхмәтованы яңа режиссер буларак тәкъдим итте.

Буа театрында хөрти хәлләр

Буа театры директоры Раил Садриев кулга алынып, суд тарафыннан чикләү чаралары кертелде, аның эше буенча тикшерүләр бара. Чикләү чаралары арасында, Раил Садриевка театрга килү тыела, дигәне дә бар. Тикшерү эше «Дәрвиш» спектакле өчен билетларны хатыны исеменә теркәлгән шәхси предприятие аша сатуда гаепләнүдән башланган иде.

Елның иң абсурд вакыйгасы

«Әкият» курчак театрына «Су анасы» спектаклен тамашачыга күрсәткән өчен бер фирма тарафыннан ярты миллион сумлык дәгъва белдерелде.

Казанда гамәлгә куелган һәм төп эшчәнлеге көнкүреш товарларын күпләп сатуга бәйле җаваплылыгы чикләнгән җәмгыять «Әкият» курчак театры җитәкчелеген товар билгесенә хокукларны бозуда гаепләп судка кадәрге претензия турында хат юллаган. Тукай әкиятенә нигезләнеп куелган «Су анасы» спектаклен тамашачыларга күрсәткән өчен, «Әкият» курчак театры әлеге җәмгыятькә 3 көн эчендә ярты миллион сум акча түләргә тиеш булып чыга. Җәмгыять шушы претензияне алган көннән Курчак театрына «Су анасы» товар билгесен кулланып билетлар сатуны һәм спектакль күрсәтүне тыя.

«Театрга судка кадәрге претензия килде, без аның буенча бернинди акча да түләргә җыенмыйбыз. Без үз мәнфәгатьләребезне судта яклаячакбыз. Моннан тыш без Роспатентка мөрәҗәгать әзерлибез. Чөнки «Су анасы», «Шүрәле» кебек сүзләрен үзенә теркәгән оешмага боларның бер катнашы да юк. Беренчедән, бу оешма үзе дә яңа гына теркәлгән. Икенчедән, бу әдәби геройлар – безнең халык байлыгы», – диде министр, бу темага ачыклык кертеп.

«Миллиард татар» порталы версиясе буенча иң яхшы спектакль

Равил Сабырның «Фәхрине үтереп ташладылар» романы буенча Александр Далматов куйган киноспектакль «Миллиард татар» язылучылары арасында иң күп тавыш җыйган әсәр булды.

Әлеге рейтингны дәвам итеп, Әлмәт театры директоры Фәридә Исмәгыйлева (халык сайлавы буенча), Камал театрының баш режиссеры Фәрит Бикчәнтәев «Ел татары» (экспертлар билгеләве буенча) дип сайланды.

Югалту

Татар дөньясы Татарстанның һәм Россиянең халык артисты Ринат Таҗетдиновны югалтты. Ринат Таҗетдиновны озату мәрасиме республиканың барлык җитәкчеләрен, татар интеллигенциясен, гомумән, татар, хәер, татар гына да түгел, Ринат Таҗетдинов дигән бөек артистны белгән бар җәмәгатьчелекне бер залга – Камал театрының Татарстан урамында урнашкан бинасына җыйды.

Равил Шәрәфиев театр сәхнәсеннән тамашачысы белән хушлашты

20 июнь көнне «Сөясеңме, сөймисеңме...» спектакле Камал театры сәхнәсендә соңгы тапкыр уйналды. Алай гына да түгел, театрның тере легендасы, Татарстанның һәм Россиянең халык артисты Равил Шәрәфиев сәхнә белән хушлашты.

Илгиз Зәйниев депутат итеп сайланды

«Әкият» татар дәүләт курчак театрының сәнгать җитәкчесе, режиссер, драматург Илгиз Зәйниев Татарстан Республикасы Дәүләт Советы депутаты итеп сайланды. Хәзер ул пьесаларны утырышлардан бушаган вакытларында язарга тиеш була.

Режиссер Айдар Җаббаров өйләнде

Тамашачы бу яңалыкны Айдарның хатыны Эльвина Насыйбуллина аккаунты аша белде – кәләш сөйгән яры белән матур видео урнаштырган. Эльвина – «ТНВ» каналында «Һава торышы»н алып баручы булып эшләгән, татар сериалларында төшкән. Эльвинага 23 яшь, ул Казан театр училищесын тәмамлаган.

Драматург Равил Сабыр театрда эшли башлады

Равил Сабыр Татарстан Язучылар берлегенең Әлмәт бүлекчәсе җитәкчесе итеп билгеләнде. Ә бүлекчәнең офисы Әлмәт театрында бер кабинетка урнашкан.

Ел цитаталары:

Әлмәт театры директоры Фәридә Исмәгыйлева: «Без театрга йөрмәүче кешеләрдән бәхетлерәк – белегез һәм тапшырыгыз!»

«Әкият» татар дәүләт курчак театрының сәнгать җитәкчесе Илгиз Зәйниев: «Мин сәхнә уртасына басам, коллективтан беркемнең аркама атмаячагын тәгаен беләм».