Җырчы Иркәнең бу арада бик бәхетле көннәре – аның ире Артур махсус операциядән ялга кайтты.
Әлхәмдүлилләһ, бик рәхәт вакытыбыз – Артурым янәшәбездә. Ул кайткач, балалар мине бөтенләй оныттылар. «Әти-әти» дип, яныннан да китеп тормыйлар. Өзелеп сагынганнар әтиләрен. Шушы бәхетле мизгелләребезне күреп сөенәм бу арада, – диде ул «Интертат» хәбәрчесенә.
Иркә яңа концерт сезонына әзерлек кебек күңелле мәшәкатьләр белән йөрүен дә әйтте. «14 сентябрьдән гастрольләрем башланып китә. Яңа костюмнар тектердек, аларны шушы көннәрдә әзерләп бетерергә тиешләр. Менә шулай мәш килеп, матур итеп яшәп ятабыз, Аллаһка шөкер», – диде ул.
- Иркәнең ире Артур узган елның көзендә мобилизациягә эләгеп, махсус операция зонасына киткән иде.
- Иркә тормыш иптәшенә булган хисләрен җырга да салып, «Өзелмәгән әле соңгы өмет» дигән яңа җырын да чыгарды.
