Яңа ел төнендә Макеевкада ракета һөҗүмендә яраланган 45 сугышчы Самарага кайтарылган

Яңа ел төнендә Макеевкада ракета һөҗүмендә яраланган 45 мобилизацияләнгән сугышчы Самарага кайтарылган. Аларны аэропортта губернатор Дмитрий Азаров каршы алган.

• Макеевкада һәлак булган мобилизацияләнгәннәр 89га җиткән – Оборона министрлыгы
• Самарада Макеевкада һәлак булганнар истәлегенә матәм узган: «3 көн инде йоклый алмыйм...»
• Макеевкада Яңа ел каршылаган хәрбиләр телефоннан сөйләшү аркасында утка тотылган

4 гыйнварда губернатор Ростовтагы госпитальгә барды һәм Макеевкадагы ракета һөҗүмендә яраланганнар белән очрашты. Азаров, 60 хәрбине Самарага кайтарачакбыз, дигән иде.

«Өйгә кайту белән, иң мөһиме – көч җыю һәм хәлгә килү», – дигән өлкә башлыгы. 

Яраланучыларның кайберләре Санкт-Петербургка җибәрелгән.

Донецкиның иярчен шәһәрчеге Макеевкадагы профессиональ-техник училище бинасына урнаштырылган 44нче полк хәрбиләренә Яңа ел төнендә Хаймарс ракеталары белән аталар. Нәтиҗәдә 89 сугышчы һәлак булды, дип хәбәр ителде. Алар башлыча Самара өлкәсеннән мобилизацияләнгәннәр.

Кайбер сугышчыларга, иптәшләрен коткаруда ярдәм иткән өчен, орден-медальләр тапшырылачак.