Яңа ел каршылаганда Донецкиның иярчен шәһәре Макеевка профессиональ-техник училищесы бинасы утка тотылды. Анда мобилизацияләнгән хәрбиләр булган. Оборона министрлыгы башта 63 кешенең һәлак булуын хәбәр иткән иде. Хәзер 89 һәлак булучы турында хәбәр ителә, дип яза «Коммерсантъ», Оборона министрлыгына сылтама белән.
ПТУ бинасы HIMARS ракеталары белән утка тотылган. 6 ракета атканнар, икесен һавада бәреп төшергәннәр, дүртесе бинага тигән. Бина тулысынча җимерелгән.
Хәрби ведомство хәбәр итүенчә, солдатлар мобиль телефоннардан файдаланган, шул сәбәпле, аларның кайда икәнлеген ачыклый алганнар.
Оборона министрлыгы гаепле кешеләрне җаваплылыкка тартырга вәгъдә бирә.
Һәлак булучылар арасында полк командиры урынбасары Бачурин да бар. Генерал-лейтенант, Россия хәрби көчләренең төп хәрби-сәяси идарәсе начальнигының беренче урынбасары Сергей Севрюков әйтүенчә, каза күрүчеләрне коткару өчен кулдан килгән барысын да эшләгәннәр.
Бу бинага аткан HIMARS ракеталары юкка чыгарылган, дип белдергән генерал.
Бинада башлыча Самарада тупланган мобилизацияләнгәннәр булган. Алар истәлегенә кичә өлкәдә матәм чаралары узды.
Самарада Макеевкада һәлак булганнар истәлегенә матәм узган: «3 көн инде йоклый алмыйм...»
Макеевкада Яңа ел каршылаган хәрбиләр телефоннан сөйләшү аркасында утка тотылган – ТАСС