Эльмира Сөләйманованың якыннары җырчының исемен мәңгеләштерү эшен башлап җибәргән. Шушы көннәрдә әнисе Эльмира Сөләйманованың сәхнә күлмәкләрен, аяк киемнәрен, эстрададагы казанышлары өчен бирелгән мактау грамоталарын, дипломнарын, бизәнү әйберләрен туган ягы Аксубай районы Иске Ибрай авылы музеена кайтарган. Бу хакта «Шәһри Чаллы» газетасы яза.
«Киләчәктә музейда күренекле авылдашыбыз, моңлы җырчыбыз Эльмира Сөләйманованың якты истәлегенә багышланган күргәзмә урын алачак. Безгә кадерле экспонатлар кайтарган өчен Фидания апага рәхмәт», – дигәннәр җырчының якташлары.
Аксубай районы Иске Ибрай – Эльмира Сөләйманованың әнисенең туган авылы. Эльмираның балачагы шушы авылда узган, ул аны үзенең туган авылы дип саный иде.
Татарстанның атказанган артисты Эльмира Сөләйманова 2022 елның 16 декабрендә вафат булды.