Диана Сәфәрованың үлеменә китергән юл фаҗигасенә кагылышлы яңа фактлар ачыкланган
Әнвәр Нургалиевның туганы, популяр блогер Диана Сәфәрованың үлеменә китергән юл-транспорт фаҗигасенең яңа фактлары ачыкланган. Кеше үлеменә бәйле җинаять эше буенча чираттагы суд утырышы Башкортстанның Чишмә районында узган.
Зыян күрүче якның адвокаты белдерүенчә, әлеге фаҗигане китереп чыгаруда гаепләнүче Вадим Латыйпов үз гаебен өлешчә генә таныган. Ул юл-транспорт һәлакәте урыныннан качып китү фактын гына раслаган. Авария килеп чыкканда исерек булуын кире каккан, дип хәбәр итә «Честно говоря» телеграм-каналы.
Адвокат әйтүенчә, Латыпов юл фаҗигасе килеп чыгуда Диана Сәфәрованы гаепли. Аның сүзләренчә, Диана зур тизлектә хәрәкәт иткән һәм аңа үзен узып китәргә комачаулык ясаган.
Диана 3 баласын ялгызы гына үстерә иде. Аның 1нче сыйныфта укучы Аиша исемле кызы һәм 5әр яшьлек Салман һәм Сәид исемле игезәк уллары ятим калды. Диананы 10 май көнне Чишмәдә соңгы юлга озаттылар.