Бу көннәрдә коточкыч зур фаҗига кичерүче Төркия һәм Сирия халкының кайгысын уртаклашып, җырчы Айгөл Бариева үзенең хатирәләре белән бүлешә. Балачагында Айгөл Бариевага да җир тетрәгәнне үз күзләре белән күрергә туры килгән икән.
«Төркия һәм Сириядә һәлак булучылар саны 6234кә җиткән. 37011 кеше яраланган. Нинди зур кайгы...
Бу көннәрдә мин балачагымдагы бер вакыйганы искә төшердем.
Сабый чакта әтием әни белән безне еш кына үзе белән гастрольләргә ала иде. Элегрәк Камал театры һәр 5 ел саен гастрольләр белән Ташкент шәһәренә йөрде. Миңа да 2 тапкыр алар белән бару бәхете тәтеде: 5 һәм 10 яшь булганда.
Шундый гастрольләрнең берсендә без җир тетрәгән вакытка туры килдек. Тирбәлешләр артык сизелмәсә дә, борчылырга сәбәп булды. Бу көнне әле дә хәтерлим.
Без кунакханәдә идек. Берзаман тумбочка өстендә торган сулы стакан идәнгә төшеп ватылды. Әни безне, шаярабыз дип уйлап, ачуланып ташлады. Без аптырап калдык, стаканга якын да килмәгән идек бит.
Кич белән бу хәлләрнең бер бездә генә түгел, башка артистларның бүлмәләрендә дә күзәтелгәнен белдек. Кемнеңдер китабы төшеп киткән, кемдер үзе караваттан егылып төшкән.
Соңрак безгә җир тетрәгәне турында хәбәр иттеләр. Бу – бик куркыныч. Һәм без бу табигать афәте каршында көчсез.
Төркия һәм Сириядә яшәүчеләрнең кайгысын уртаклашам», – дип яза сторисларында Айгөл Бариева.
- Төркиядә җир тетрәү: хәрабәләр астында җиде сәгать яткан бала исән килеш табылган
- Җир тетрәү ни сәбәпле һәм кайда була, ни өчен Татарстанда да җир тетрәргә мөмкин – геолог
- Төркиядә көчле җир тетрәү: «Туганнарның өйләре ишелгән, ике онык юк, диделәр»