Хайваннар белән видео төшерүче Башкортстан блогеры Айдар Кәлимуллин камыт кияргә җыена
Башкортстанның авыл тормышын күрсәтүче һәм йорт хайваннары, терлекләр белән «җанлы» видеолар төшерүче блогеры Айдар Кәлимуллин 30 яшен тутыргач өйләнергә булган. Ул сөйгән кызы Аделинага тәкъдим ясаган.
Ул сөйгәненең күзен яулык белән бәйләп, кызыл келәмнән вертолет янына алып килгән һәм чәчәк бәйләме белән йөзек бүләк иткән.
«Бу көн килеп җитте», – дип язган фото астына кияү кочагындагы кәләш.
Блогер яңа гына Аделина белән сирәк, ялларда гына күрешүе турында сөйләгән иде. Кайберәүләр «яшьләр аерылышырга йөри» дип борчылган булган, ә икенчеләре Айдарның «камыт кияргә җыенуын» сизеп йөргән. Хәзер яшьләр гөрләтеп туй уздырыр, дип көтәбез.
Хайваннарны һәм авыл тормышын яратучы, авылны сагынып яшәүчеләрне яңа видеолары белән куандыручы Айдар Кәлимуллинны җитди адымы белән беренче булып блогер дуслары котлаган.
Башкортстан блогеры кулында казларны биетә, буаз сыерны күрсәтә.