Шартлаган Пригожин самолетындагы бердәнбер хатын-кызның соңгы сүзләре, фотосы чыкты
![Шартлаган Пригожин самолетындагы бердәнбер хатын-кызның соңгы сүзләре, фотосы чыкты](https://intertat.tatar/resize/shd/images/uploads/news/2023/8/24/5fd62affb189734c805149e7e4d5ef64.jpg)
Евгений Пригожин самолеты һәлакәтендә үлгән бердәнбер хатын-кыз – Кристина Распопова. Аңа 39 яшь булган. Распопова стюардесса булып эшләгән.
Кристина элек Мәскәүдә яшәгән, ләкин күптән түгел «Мнт Аэро» фирмасына эшкә урнашкан һәм Петербургка күченгән. Моңа кадәр дә ул бизнес-авиациядә эшләгән.
Очып китәр алдыннан берничә сәгать алдан ул туганнарына рейсның ниндидер сәбәпләр аркасында тоткарлануын әйткән. Аэропорт кафесында рейсны көтеп утырган вакытта төшергән фотосын социаль челтәргә урнаштырган.
Кристина – Чиләбе өлкәсенең Еманжелинск прокуроры урынбасары Евгений Распоповның сеңлесе. Распопов турында быел массакүләм мәгълүмат чаралары язган булган. Ул, шәһәр прокуроры вазифаларын вакытлыча башкаручы буларак, РФ Тикшерү комитеты башлыгы Бастрыкин белән сүзгә килеп алган булган. Чиләбедәге Тикшерү комитеты Бастрыкин күрсәтмәсе буенча шәһәр хастаханәсендә 2 ир-атның үлеме факты буенча җинаять эше кузгаткан була. Әмма икенче көнне үк Распопов бу карарны, законсыз дип санап, гамәлдән чыгарган.
- Пригожин самолеты кичә Тверь өлкәсендә Куженкино торак пункты янында шартлады. «Катя, мин белмим, син күрәсеңме? Самолет очты-очты да шартлады. Шартлау бик көчле булды», – дип видео яздырган вакыйганы күрүчеләрнең берсе.
- Росавиация Тверь өлкәсендә һәлакәткә очраган бизнес-джет пассажирлары исемлеген чыгарды. Очкычта Евгений Пригожиннан кала, аның 2 урынбасары да булган. 10 кешенең дә мәетен тапканнар, «Интертат» исемлекне чыгарды. Аларның күбесе янып беткән диярлек.