Равил Галиев Резидә Шәрәфиева кабере янында: «Саубуллашып китәргә дип кердем...»
Җырчы Равил Галиев иҗатташ дусты Резидә Шәрәфиеваның каберен зиярәт кылган. Якын кешесенең кырыгына багышланган Коръән мәҗлесеннән соң, Равил Галиев зиратка да туктамый булдыра алмаган.
«Резидәбезгә багышланган Коръән ашы тәмам… Резидә янына, саубуллашып китәргә дип, зиратка кердем. Бик матур, сары төстәге чардуган да куйганнар. Тыныч йокла, дустым», – дип сөйли Равил Галиев мессенджердагы статусларында.
Кичә туган авылы Минзәлә районы Наратлы Кичү авылында туганнары һәм якыннары Резидә Шәрәфиеваның кырыгын уздырганнар, дип язган идек.
Татарстанның халык артисты Резидә Шәрәфиева 19 июль көнне вафат булды. Соңгы елларда аның каты авырганы билгеле. Җырчыга 59 яшь иде.
Резидә Шәрәфиева турында якыннары: «Резидәбез янәшәбездә сыман, ул гел безнең белән...»