Әниләренә туган көн бүләге ясарга маташкан балалар боз астына төшеп киткән
Малайлар буада балык тотмакчы булган.
Ставрополь шәһәрендә ике малай бозлы суда батып үлә язган. Балалар әниләренә туган көнгә сюрприз ясамакчы була. Алар боз астыннан балык тотарга җыена. Тик бу эш фаҗига белән тәмамлана язган. Бу турыда «Вести» каналы хәбәр итте.
15 декабрьдә ике малай буага балык тотарга бара. Бу вакытта елгадагы боз биш сантиметр чамасы калынлыкта була. Балалар бозга басуга ук суга төшеп китә. Алар бозлы судан үзләре чыга алмый.
Ярда торган шаһитлар балаларның тавышын ишетеп ала. Алар ярдәмгә ташлана. Шаһит ир-атлар малайларны таяклар ярдәмендә чыгарып карый, тик файдасы булмый. Шуннан соң алар үзләре суга керә һәм балаларны алып чыгалар. Хәзерге вакытта ике бала да хастаханәдә, алар бик туңган.
«Балаларны вакытында коткарганнар — бу бик зур бәхет инде. Малайларның икенче туган көне бу. Төбәктәге сулыкларда хәзер гаять куркыныч. Бер объектта да боз калынлыгы зур түгел әле, анда керергә ярамый», — дип сөйләгән Тикшерү комитеты вәкиле.
Коткаручылар ата-аналарны балаларын күзәтеп торырга һәм сулык өстенә уйнарга керергә рөхсәт итмәскә өнди, диелә бу хәбәрдә.
Калынлыгы 7 сантиметрдан кимрәк булган боз өстенә чыгу тыела. Тимераякта шуар өчен боз калынлыгын кимендә 13 см булырга тиеш. Калынлыгы 25 сантиметрдан арткач кына, боз өстендә берьюлы берничә кеше йөрү рөхсәт ителә.
Боз караңгы-яшькелт төсле булса — ул нык дигән сүз; болганчык һәм саргылт төстәге, тимгелле боз өслеге куркыныч була, дип язган идек.
- Казандагы күлдә юка боз өстендә йөрүче балаларның әти-әнисенә штраф салалар
- Тугыз кеше утырган машина бозлы суга баткач, авырлы хатын һәм биш айлык бала үлгән
- Татарстанда боз астына төшеп китүчеләрне ничек коткарганнар?