Казандагы күлдә юка боз өстендә йөрүче балаларның әти-әнисенә штраф салалар
Калынлыгы 7 сантиметрдан кимрәк булган боз өстенә чыгу тыела.
Казанның Дәрвишләр бистәсендә урнашкан Комсомол күле юка боз белән капланган. Шул боз өстендә йөргән балалар сурәтләнгән мизгелне шаһитлар видеога төшергән. Әлеге кадрлар социаль челтәрләрдә таралды. Бу турыда «Татар-информ» хәбәр итте.
Малайлар ярдан берничә метр ераклыкта боз өстендә туктала. Алар күңелле генә аралашалар. Социаль челтәр кулланучылар укучыларның тәртибен ошатмый, аларның ата-аналарына гаҗәпләнә.
Россия Гадәттән тыш хәлләр министрлыгының Татарстан буенча баш идарәсе ата-аналарны балаларының юка боз өстенә керүен кисәтергә чакыра.
Бүген Татарстанның Кече суднолар буенча дәүләт инспекциясе Казансу елгасындагы боз калынлыгын үлчәде һәм бик куркыныч чор булуын искәртте. Бу турыда «Татар-информ» хәбәр итте.
Хәзер боз ясалу чоры, боз калынлыгын 5 см чамасы. Калынлыгы 7 сантиметрдан кимрәк булган боз өстенә чыгу тыела. Тимераякта шуар өчен боз калынлыгын кимендә 13 см булырга тиеш. Калынлыгы 25 сантиметрдан арткач кына, боз өстендә берьюлы берничә кеше йөрү рөхсәт ителә.
Боз караңгы-яшькелт төсле булса — ул нык дигән сүз; болганчык һәм саргылт төстәге, тимгелле боз өслеге куркыныч була.
Дәрвишләр бистәсендәге Комсомол күле бозында йөргән өч баланың әти-әнисенә 2 сумга кадәр штраф салачаклар. Ныгымаган боз өслегенә чыккан олы кешеләргә 1,5 мең сум күләмендә штраф билгеләнә, диелә бу хәбәрдә.