«Ленарымның иң зур бүләге»: махсус операциядә һәлак булган Тукай районы егетенең улы туды

Махсус операциядә батырларча һәлак булган Тукай районы Калмаш авылы егете Ленар Шәмисевның улы туган. Сөенечле хәбәрне «Интертат»ка Ленарның тормыш иптәше Лилия Шәмсиева җиткерде.

«Ленарымның иң зур бүләге булып, кичә, 2 сентябрь көнне, улыбыз дөньяга аваз салды. Буе – 56 сантиметр, авырлыгы – 3910 килограмм.

Улыбызның исемен әле уйлап бетермәдем. Ленарга: «Малай булса, үзең теләгән исемне кушарсың», – дия идем. Кызганыч, әйтергә җитешмәде… Әле вакыт күп дип, үзем дә сорамадым… Башымда 2 исем варианты бар иде. Беренчесен, интернеттан сайлап, инде Ленардан хәбәр килми башлагач, аңа язып җибәргән булганмын. Ирем һәлак булгач, аның исеменә якын исем кирәк, дип эзләдем. Улымны күрдем дә, беренче исем күбрәк туры килә кебек. Шунысында тукталырбыз дип торам», – диде Лилия.

Ленарын югалтса да, Лилия ялгыз түгел, Аллаһка шөкер. Янәшәсендә теләсә кайсы мизгелдә ярдәм кулы сузардай якыннары бар. Кичә дә, әти-әниләре, туганнары, бәбине тәрәзәдән булса да күрик дип, бала таптыру йорты янына тезелешеп килгәннәр.

Лилиянең Амелия исемле кызы да үсеп килә. Ул хәзер апа булды инде.

Сабыйлар сау-сәламәт, игелекле балалар булып үссен. Ә инде Лилиягә Ходай балаларын үстерергә көч һәм сабырлык бирсә иде.

«Интертат»та Ленар Шәмсиев турында чыккан язма белән биредә танышырга була.