Кешенең кан тамырларында төерләр ни сәбәпле барлыкка килә?

Атеросклероз төеннәре (бляшкалар) — хәзерге җәмгыятьтә киң таралган проблемаларның берсе. Дөрес тукланмау, зарарлы гадәтләр, стресслар һ.б. тәэсирендә, кан тамырлары тыгыла, бу үз чиратында аяныч нәтиҗәләргә китерергә мөмкин. Бу турыда Татарстан Сәламәтлек саклау министрлыгының матбугат хезмәте хәбәр итте.

Түбән Кама Үзәк район күппрофильле хастаханәнең рентгенохирургия алымнары бүлегендә ел саен муен һәм аяк кан тамырларының атеросклерозыннан интегүче йөзләгән пациентка операция ясыйлар. Бүлекне диагностиканың һәм дәвалауның рентгеноэндоваскуляр методлары буенча тәҗрибәле табиб Алексей Крохалев җитәкли. Аның сүзләренчә, бляшкаларны вакытында ачыклау һәм кан тамырлары эчендә операция ясау кешене ишемия һәм инсульттан коткара.

«Атеросклероз бляшкалар төрле урыннарда — аяк кан тамырларында, муен тамырларында була. Анда да эндоваскуляр дәвалауны, ягъни стентлау, яки баллон ангиопластиканы үткәрергә була», — дип сөйли Алексей Крохалев.

Атеросклероз булуын ачыклау өчен, диспансеризация узарга кирәк. Биредә авыруны иртә стадиядә ачыклыйлар. Канга гомуми анализ ясап, холестерин, гомуми липид алмашуны тикшерәләр. Мондый тикшерүләр вакытында инсульт куркынычы янаган кешеләр ачыклана.

«УЗИ мөһим роль уйный — беренчел скрининг тикшеренүендә үк бляшка табыла. Аннары пациент кан тамырлары хирургына эләгә, табиб аны үз контроленә ала, пациентны ангиографиягә җибәрә. Ә алга таба кан тамырлары хирурглары белән бергә без дәвалау тактикасы турында фикер алышабыз», — ди табиб.

• Холестеринны даруларсыз ничек киметергә?
• Холестерин "бляшкалары" нәрсәсе белән куркыныч?
• Ни өчен үсемлек мае составында берничек тә холестерин була алмый?