Гөлнара Тимерҗанова үзеннән шактый гына яшь егетләрдән хатлар килүе, күрешергә, хәтта кияүгә чыгарга тәкъдим ясаулары турында сөйләгән. Бу хакта «Шәһри Чаллы» газетасы яза.
«Ул гына да түгел, ватсапка да язалар. Кайдан телефон номерымны табалар икән? Шаккатмалы», – дигән ул.
Исегезгә төшерәбез, берничә ел элек җырчы икенче ире белән аерылышты. «Шуңа да карамастан һаман суд юлларын таптый. Йортның балага тиешле өлешен бирмәс өчен ниләр генә кыланмый», – дигән җырчы.
Сүз уңаеннан, ул Гөлнара ханымнан 7 яшькә яшьрәк. Аларның уртак кызлары Айзифа үсеп килә. Гөлнара ханымның олы улы Иделгә 24 яшь.
«Гомумән кияүгә чыгасым килми. Нигә кирәк ул миңа? Тагын кемнеңдер көенә керергә, аны көйләп яшәргә бер теләгем дә юк», – дип сөйләгән газетага җырчы.