Гөлнара Тимерҗанова Украинада һәлак туганы турында: «Повестканы хатыны алган…»
Гөлнара Тимерҗанованың якын туганы махсус операциядә һәлак булган дип хәбәр иткән идек. Айдар җырчының әнисе ягыннан өченче буын туганы икән.
Айдар Башкортстанның Калтачы районы Күгәрчен авылында туып-үсте. Гомер буе бик тырыш егет булды. Авыл халкы бик хөрмәт итә иде үзен. Авылда яшәгән чакта туган ягы өчен тырышып, янып йөргән кеше. Мәчет салганда үзенең тракторы белән зур булышлык күрсәтте.
Соңрак гаиләсе белән Нефтекамскига күченде ул. Үзе Екатеринбургка барып, вахта ысулы белән эшләп йөри иде. Повестканы үзе эштә чакта китергәннәр, тормыш иптәше кул куеп алып калган…Кайтып, военкоматка бару белән үк мобилизацияләделәр үзен, энем 44 яшен окопта каршылады. Март аенда, каты сугышларда һәлак булган.
Энемнең ике баласы ятим калды. Берсенә 18 яшь, икенчесе 9 сыйныфта укый. Кичә Нефтекамскида Айдар энем һәм бер капитан белән хушлашу мәрасиме булды. Алар икесе бергә хезмәт иткәннәр, икесе бер үк көнне һәлак булганнар.
Айдар энемне үзенең туган авылына алып кайтып җирләделәр. Айдарның да, хезмәттәшенең дә урыннары оҗмах түрләрендә булсын», - диде ул.
Фото: © Гөлнара Тимерҗанова фотолары
