Дмитрий Песков һәм аның хатыны Татьяна Навка коронавирус белән авырый

Россия Президентының матбугат сәркатибе Дмитрий Песков COVID-19 белән авырый. Бу турыда ул РИА Новости агентлыгына сөйләгән. 

Дмитрий Песков үзенең хастаханәдә ятуын әйткән.

Дмитрий Песковның хатыны Татьяна Навка да COVID-19 коронавирус йоктырган. Бу турыда «Московский комсомолец» хәбәр итте. 

Навка үзе бу хәбәрне раслаган. Ул хастаханәдә ятуын, кәефе канәгатьләнерлек булуын әйткән. 

«Мин ике көндә хәлләндем диярлек. Барыс да нормага кайтты: каным да, температурам да юк», — ди Навка.

Татьяна Навка сүзләренчә, алар ире белән икесе дә даими рәвештә табиблар күзәтүендә тора. Ул коронавирусны иреннән иярткән булуы ихтималын әйтә. Хәзер аларның гаилә әгъзалары үз-үзеңне изоляцияләү режимында яши, ире эшен дәвам иттерә.

2006 елда Олимпия чемпионы булган Татьяна Навканың авыруы җиңелчә формада уза. Бу турыда РИА Новости агентлыгына Navka Show матбугат хезмәтендә әйткәннәр.

«Татьяна Навканың һәм аның иренең коронавируска тесты уңай нәтиҗә күрсәтте. Алар хастаханәгә ятты. Хәзерге вакытта аларны табиблар дәвалый. Татьянаның авыруы җиңелчә формада уза. Ул сәламәтләнде диярлек. Дмитрий Сергеевич та үзен яхшы хис итә, ләкин аның сәламәтләнү процессы бераз озаграк булуы ихтимал», — дип сөйләгәннәр матбугат хезмәтендә.

Песковның кызы Елизавета әтисен ун көн элек күргән. Бу турыда ул «Газета.ру» сайтына сөйләгән. «Бөтен чараларны күреп, урамда гына күрештек. Көн саен телефоннан сөйләшәбез. Сәламәтлеге турында комментарий бирмим», — дигән ул. Елизавета үзенең сәламәт булуын, әтисе өчен борчылуын да әйткән. Ул әти-әнисе белән бергә яшәми икән.

«Мин тулысынча сәламәт. Борчылганыгыз өчен рәхмәт. Әлбәттә, мин бик дулкынланам. Коронавируска ышанмый торган акыллыбашлар калмагандыр, барысы да вәзгыятьнең җитдилеген аңлыйдыр дип ышанам», — дигән Елизавета.