Керәшеннәрдән беренче шагыйрь Җырчы Җәкәү - Яков Емельянов турында: "XIX йөздә җанлы сөйләм телендә язуы белән үзенчәлекле"
Әдәби телнең сөйләм телгә нигезләнүе бары Тукай чорында киң таралыш ала. XIX йөздә язылган татар әдәби әсәрләрен укысагыз, никадәр дәрәҗәдә аңлый алыр идегез? Ул чорда тел гарәп-фарсы һәм төрки алынмалар белән шактый чуарланган була. Әмма әдәбият киңлегенә шул вакытта сөйләм телендә язучы “җырчы Җәкәү” дигән шәхес килеп керә. Яков Емельянов - "Төрки-татар иҗатчылары һәм әдәбия ядкәрләр" проектының каһарманы. Тыйнак, ләкин үз сүзен бәреп әйтүче, иҗатында тормыш каршылыклары турында әрнеп язучы шагыйрь турында “Татар-информ” хәбәрчесенә Г.Ибраһимов исемендәге Тел, әдәбият һәм сәнгать институтының әдәбият белеме бүлеге мөдире, филология фәннәре докторы Әлфәт Закирҗанов сөйләде.
