Саксофончы Артур Mauzer белән җырчы Лия Шәмсина ике ел элек никах укытканнар иде. Яшь пар, билгеле сәбәпләр аркасында, туй мәҗлесен уздырмыйча торды. Ә кичә Лия сторисларында туй күлмәгенә туры китереп туфли алуы турында сөйләп алды. Димәк, бу талантлы парның туе көтелә! Бу хакта белешергә теләп, «Интертат» хәбәрчесе Артур белән элемтәгә керде.
«Әйе, туебыз 3 сентябрь көнне Чаллыда узачак. Инде ике ел элек никахлашсак та, пандемия чикләүләре булу сәбәпле, туебыз чигерелеп килде. Язылышканда да иң якыннарыбызны - ун кеше генә чакырдык. Инде туйны үткәрергә вакыт җитте дип уйладык. Туй мәҗлесебез хәләл булачак. Бәйрәмдә 140лап кунак булыр дип көтелә. Аларның күпчелеге туганнарыбыз. Туйны аклы-каралы һәм пастель тоннарда, кино стилендә оештырырга уйлап торабыз. Туйның программасы, алып баручының кем булачагы турында әле киңәшләшәбез», - дип сөйләде ул.
Яшьләрне әлеге матур вакыйга белән тәбрик итәбез. Мәхәббәтегез гомерлек булсын!
-
Яшь җырчы Лия Шәмсинага сөйгәне кияүгә чыгарга тәкъдим ясаган
-
Лия Шәмсина+Артур Mauzer: иҗади парның ярәшү мизгелләре видеосы
-
Артур Mauzer һәм Лия Шәмсина: «Татар эстрадасына яңалык алып киләчәкбез»