Алсу Сөнгатуллина улы хезмәт итә торган махсус операциядәге часть турында хәбәр җиткергән

Махсус операциядә җырчы Алсу Сөнгатуллинаның улы да хезмәт итә торган часть әти-әниләре һәм якыннары Татарстан җитәкчелегенә мөрәҗәгать белән чыккан. Әлеге мөрәҗәгатьне үзенең сәхифәсенә «Фәридә – Алсу» дуэты солисты, җырчы Алсу Сөнгатуллина һәм аның бик күп сәхнәдәшләре урнаштырды.

Якыннары әйтүенчә, егетләр инде икенче ел Сватово юнәлешендә хезмәт итәләр.

«Бүгенге көндә безнең батальонның төп өлеше штурмда, калганнары да шушы көннәрдә китәчәк. Югалтулар бик күп, һәр көн саен яраланучылар һәм һәлак булучылар турында хәбәр килеп тора. Алар илне саклау бурычыннан баш тартмый. Тик мобилизацияләнгәннәр алгы сызыкта түгел, оборонада булырга тиеш», – дип сөйли һәм үзләренең мөрәҗәгатьләре игътибарсыз калмас, дип ышана әти-әниләр.

Бу көннәрдә социаль челтәрләрдә әлеге батальон өчен гуманитар ярдәм дә җыйдылар. Бүген ярдәм машинасы егетләр янына юлга кузгалган.

Сәхнәдәш дуслары да Алсу Сөнгатуллина һәм аны улы Айрат өчен борчыла. «Фәридә – Алсу» дуэтының солисты Фәридә Ибраһимова Алсу Сөнгатуллина турында:

«Алсуыбызның нервларына шаккатам. Соңгы арада язмыш аны бик нык сыный. Ул көчле, кешелекле, үзенең борчуларын беркайчан да кешегә күрсәтми. Әтисенең бик авыр китүе, кечкенә улының мәктәптәге атышта яраланып, могҗиза белән генә исән калуы, ә хәзер – өлкән улы алгы сызыкта. Ходай сакласын аны. Шушы вакыт эчендә Алсу беркайчан, бернәрсә куймады. Ул ярдәм сорый икән, димәк, инде эшләр чыннан да бик начар, дигән сүз. Тизрәк бетсен иде бу афәт, егетләр, ирләр исән-сау кайтсыннар», – дип язган.

• Җырчы Алсу Сөнгатуллина улын махсус операциягә озаткан
• Алсу Сөнгатуллина махсус операциядәге улы турында: «Күрмәгәннәрен күрәләр балакайларым»