Татарстанның баш казые сайланды
Диния нәзарәтенең IX Корылтаенда Татарстанның баш казые сайланды. Бу вазифаны алдагы 4 елда Җәлил хәзрәт Фазлыев башкарачак.
Бу минутларда «Казан Экспо» үзәгендә Татарстан Республикасы мөселманнары Диния нәзарәтенең IX корылтае уза. Корылтайда мөфти һәм республиканың баш казые сайланды.
Алдагы дүрт елда шулай ук Җәлил хәзрәт Фазлыев баш казый булачак. Ул бу вазифага беренче тапкыр 2006 елда сайланган иде.
Җәлил хәзрәт Фазлыев 1956 елның 24 сентябрендә Бөрбаш авылында туган. Урта белем алганнан соң Казан авыл хуҗалыгы институтының икътисад факультетында укый, 1979 елда икътисадчы-оештыручы белгечлеген ала. 1981-1988 елларда район авыл хуҗалыгы һәм азык-төлек идарәсендә, 1988-1994 елларда «Бөрбаш» совхозында баш икътисадчы булып эшли.
Балачактан ук дингә ихлас бирелгән кеше буларак, Балтач районында дини хәрәкәтне торгызучыларның берсе һәм башлап йөрүчесе була. 1990 елда ул экстерн тәртибендә имтихан тапшырып имамлыкка шәһадәтнамә ала.
1990 елдан – Бөрбаш мәчетенең имамы.
1994 елдан районның, 2000 елдан — Татарстанның баш мөхтәсибе. 1995 елда Татарстан республикасындагы диния нәзарәтендә Үзәк ревизия комиссиясе рәисе итеп сайлана. 1998 елдан — Татарстанның Төньяк районнарын, Киров өлкәсенең чиктәш районнарын берләштергән Төньяк казыятның баш казые.
2006 һәм 2010 мөселман корылтайларында Татарстанның Баш казые итеп сайлана.