Җырчы Айсылу Габдинова социаль челтәрдәге аккаунтында кисәк кенә үлеп киткән танышы турында сөйләде. Гүзәл исемле танышы лазерлы эпиляция ясый торган мастер була. Җырчы аның белән соңгы тапкыр июль аенда языша. Шушы көннәрдә Айсылу Габдинова мастерының үлүе турында белеп ала.
– Ярты ел буе лазерлы эпиляция ясый торган мастерга йөрдем. Аңа 40 яшь иде. Бала табар алдыннан йөрүдән туктадым.
Мин сөйләшергә яратам. Хатын-кызларның уртак темалары табыла. Аның белән дә сөйләшә идек. Ул бик ачык кеше иде. 3 кызы бар. Күптән түгел ире белән яхшы торак комплексында квартира сатып алганнар. Тормышында бар да яхшы иде.
Шушы көннәрдә процедураларны яңартып җибәрергә булдым. Шул мастерның номерын таптым. Карасам, фотосында шәм рәсеме тора. Мин, якыннары белән берәр нәрсә булгандыр, мөгаен, әлегә язылмау хәерлерәктер, дип уйлап, фотосын ачып карадым. Статусында: «Гүзәлнең йөрәге 11 август көнне тибүдән туктады. Ул арабыздан китте», – дип язылган иде. Шаккаттым. Бүген кеше бар – иртәгә юк. Шушы хәлдән һаман да өнгә килә алмыйм, – дип сөйләде Айсылу Габдинова.