Хоккейчы Данис Зарипов 95 яшьлек җанатар әбине өенә алып кайтып китә язган
30 сентябрь көнне “Татнефть” боз сараенда Казанның “Ак барс” һәм Түбән Каманың “Нефтихимик” командалары күреште. Яраткан “Ак Барс” командасы өчен җан атарга 95 яшьлек Фатыйма Шиһаповада килгән.
Ул хоккейга оныгы белән килгән. Оныгы “Дәү әникадан интервью алалар, мин ярдәм итәм”, – үз битенә пост та керткән. Аннары Фатыйма апаның танылган хоккейчы Данис Зарипов белән төшкән фотосын да кертеп, “Менә бит алар, люблю вас”, – дип язып куйган.
Аннары оныгы инстаграмдагы “история”гә “Зарипов алып китте дәү әнине” дип язып, Фатыйма апаның ак мерседес машинасы фонында төшкән фотосын куйган.
Бу фото тиз арада төрле социаль челтәрләрдә таралды. “Ак барс” хоккей командасы да инстаграмдагы үз битенә Фатыйма апаның Данис Зарипов белән төшкән фотосын куеп, аны өлкәннәр көне белән дә котлаган.
Язылучылар: “Котлыйбыз сезне, Фатыйма апа!”, “Исәнлек-саулык сезгә, ә “Ак барс”ка уңышлар”, “Ак барс” эмблемасы төшкән яулык кирәк”, – дигән комментарийлар да калдырганнар