Салават Фәтхетдинов: "Мулла турында мәзәкләр аз түгел! Нәрсәсе бар инде аның?"

16 август 2019

Язманы тыңлагыз

Сөйләм синтезаторы:

Татарча сөйләм
синтезаторы

кулланыла

Автор: Алинә АЙДАРОВА
Фото: Салават Камалетдинов
Салават Фәтхетдинов янына бардым. Утырып бер сөйләшим әле дидем. Кертсә кертер, аның концертындагы Әлмәндәр әйтмешли, “чурты-матыр” булмаса, кире борылып кайтып китәрмен дип уйладым. Кертте. Сөйләштек.

Шуны әйтим: Салават абыйны сәхнә артында табу җиңел булмады. “Кайда ул?” - дип сорадым. “Кайдадыр шунда инде”, - диләр. Шулай итеп йөрдем-йөрдем дә таптым. Салават абый утырган бүлмәдә 5-6 абый тора. Болар, мин әйтәм, берәр “нәчәльниклардыр” инде. Салават абый үзе дә нәрсәдер саный иде. Ярар, бераз бушагач керермен дип, алга таба үттем. Күрәм: Закир Шаһбан утыра (быел ул Салават абый концертларында катнаша). 

- Закир абый, Салават белән күпме таныш инде сез?

- 1995 ел иде ул. “Татар җыры” бәйгесендә таныштык. Ул жюри рәисе урынбасары иде, мин катнашучы. Бу бәйге хәзерге “Татар җыры” фестивале түгел, бутамагыз. Мәдәният министрлыгы уздыра иде аны.

- Ничәнче урын алдыгыз соң?

- Профессионал җырчылар арасында икенче дәрәҗә лауреаты булдым.

- Салават белән гел дус булдыгызмы?

- Әйе, без гел яхшы мөгаләмәдә. Абзый дип эндәшәм. Менә быел бергә эшләргә чакырды. Ул минем иҗатымны гел югары бәяләп килә иде.

- Корбан чалдыгызмы бу елны?

- Әйе, менә авылдан гына кайттык әле.

“Гафу итегез, башка алай эшләмим”, - дип әйткәнмен, ди”

Тагын Салават абый гримеркасы ишеге янына килдем. Бүлмәдә кешеләр әзәйгән, Кәрим Тинчурин исемендәге татар дәүләт драма һәм комедия театры директоры Фәнис Мөсәгыйтов һәм Альберт исемле бер абый гына бар иде. Сөйләшү барышында безгә Фирзәр абый Мортазин да кушылды. Ул Альберт абыйның дин әһеле булуын әйтте. Белмим, шаяртканмы икән...

Иң башта шуны языйм: абыйлар минем өчен чыннан да абый булыр яшьтә. Оялдым, яшермим. Ничекләр шулар белән сөйләшә башларга икән, дим. “О, чибәр кыз”. – дигән булып, алар да мине уңайсызландырды. Шулай да уртак тел таптым кебек. Салават абыйга сорауларымны бирдем. 

Билгеле, Салаватның концертларны шаяртуларсыз үтми. Аның мәзәкләренең берсе дин әһелләренә ошамаган һәм алар Салаватның гафу үтенүен сораганнар. 

Журналист: Салават абый, нишләп әлеге шаяртуга шул тиклем бәйләнделәр икән?

Салават: Миңа каршы чыгучыларның шаяруны аңламауларында мин гаепле түгел. Ул бары тик шаяру гына. Мин ул дин әһелләренә ышанмыйм, мин бер Аллаһы Тәгаләгә генә ышанам. Гомер буе Алла белән яшәдем. Ә мәзәкләргә килгәндә, мулла турында мәзәкләр аз түгел! Нәрсәсе бар инде аның?!

Фәнис Мөсәгыйтов: Татарлар турында да, якутлар турында да шаяртулар бар. Боларына нәрсә булган?

Журналист: Бүгенге һәм элеккеге дин аерыламы?

Салават: “Беспредел”, сеңлем. Хәзерге вакыттагы динчеләр белән элеккеге динчеләр бер түгел алар. Беләсеңме, бу хәл турында нәрсә әйтәсем килә: ике татар сугышып, адәм көлдерәбез. Әле ул миңа каршы чыкканнар алдакчы да. Минем яныма берәү дә килмәде, ә алар килдек дип сөйлиләр. “Гафу итегез, башка алай эшләмим”, - дип әйткәнмен, ди. Булмады! Корбан гаете көнне алдашып йөреп буламы?! Юк!

"Дин әһеле" дип аталган абый: Адәм баласы 100% камил була алмый. Һәр кешенең эчендә “минлеге” бар, һәм ул беркайчан синең артыңнан калмый. Бу шаяруга килгәнә, бары тик шаяру икәнен генә аңларга кирәк.

Журналист: Татар теле турында нәрсә әйтә аласыз?

Салават: Бернәрсә әйтмим.

Журналист: Балаларыгыз татарча сөйләшми.

Салават: Бу зур бәла инде.

Журналист: Концертыгызның асылы нидә? Мәхәббәт турындамы?

Салават: Һәр кеше үзенчә аңларга тиеш. Аңламадым, дисен. Димәк, журналист булуыңны онытып, тамаша карагансың. Ә мәхәббәткә килгәндә, аның аңлатмасын һәр кеше үзенчә аңлый.

Журналист: Мәхәббәт янында хыянәт бар икәнен аңладым.

Салават: Белмәгән идеңме шуны? Сине алдаганнары булдымы? Булган, менә шул, сеңлем. Бер нишләп булмый, тормыш бит бу. Бар шундый әйберләр, кызым, аларны әйтергә ярамый. Әйтми калу яхшырак.

Журналист: Хатын-кыз хыянәтне кичерергә тиешме?

Салават: Хатын-кыз хыянәтне белмәскә тиеш. Хатын бөтен әйберне белсә, үләргә була (көлә). Ә “лучше” хыянәт итмәскә.

Журналист: Нишләп концертыгызда төп герой итеп Әлмәндәрне сайларга булдыгыз?

Салават: Мин бу сорауга әзер идем. Әлмәндәр – татарның иң алдынгы образы. Әле Илдар Хәйруллин килде. “Мин шул чаклы курыктым. Ничек моңа Зәкиевич алынды икән дип уйландым”, - ди. Әлмәндәрне сайлавымның тагын бер сәбәбе: яшьләр дә әлеге образ белән таныш булырга тиеш. Әлмәндәр кебек мәңге үлмәс образлар татарда юк, сеңлем.

Журналист: Нишләп кеше усал ул?

Фирзәр Мортазин: Заманасы шундый аның. Әлек “стабильность” дигән бик яхшы күренеш бар иде. Кеше акчасын җыя иде дә, теләген әйберен ала иде. Ә хәзер җыя да, алам дип баргач, ул әйбернең хакы бишкә арткан була. Кеше дөнья куа, сеңлем.

Кеше дөнья куа, әйе. Салават абыйның бер сүзе исемдә калды: “Минем концерт башлануга унбиш минут кала беркем белән дә сөйләшеп утырып, интервью биргәнем юк иде. Син бүген бердәнбер! Мин синең белән рәхәтләнеп чәй эчәм. Берсен дә кертми идем”, - диде ул.

Концерттан репортажда залда буш урыннар бар дип язган идем. Юк, сүзләремне кире алмыйм, алар ул көнне чыннан да бар иде. Ә менә интервью алырга барган көнне булган концертта чакырылган кунакларга урын таба алмадылар. Зал тулы иде.

Салаватны тамашачы ярата. Ә ул үзе нормаль вә адекват кеше. Администраторы Вадимга аерым рәхмәт! Каршы алды, кертте. “Үләм, үҗәт син”, - ди. 

Шуны әйтергә кирәк: Салават янына кертмиләр дип зарланучылар арасында журналистлар да бар. Киңәшем шул: сез, коллегалар, барыгыз да керегез! 

Әле фотога төшмәдек Салават абый белән. Тагын бер барасы булыр.


  Без Инстаграмда

Фикерләр








Шоу-бизнес

Фахишә рольләреннән - графиня рольләренә кадәр үсү, өч бала табу һәм Голливудка бару: җырчы Айлинның танылуы турында 10 факт

Татар эстрадасында яңа йолдыз – Айлин дигән матур җырчы кабынып килә. Аны “матур” диюем юкка булмады: тышкы кыяфәте, үз-үзен тотышы, җырлавы да нәзакәтьле аның. Татар эстрадасына ул нинди яңалык алып килергә җыена? Бу хакта Айлин “Татар-информ” агентлыгы оештырган матбугат очрашуында сөйләде.

Шоу-бизнес

Тулы зал тамашачы җыя ала торган ун артист

Татар эстрадасын күзәтеп баручы “Интертат” электрон газетасы журналисты Алинә Айдарова “Топ-10 популяр татар артистлары” исемлеген тәкъдим итә.

Шоу-бизнес

Иркә концерты: Хәниянең "Кышкы чия"се, чәчәк эченнән бомба эзләүче сакчылар һәм Элвин Грей

Татарстанның атказанган җырчысы Иркә Казанда үзенең концертын куйды. Тамаша тәмамлангач, түбәндәге фикергә килдем: “Менә күрерсез Иркә әле чыннан да популяр җырчы булачак”. 

БАШКА ЯҢАЛЫКЛАР

Интертат.ру / Intertat.ru © 2001 - 2019 Әлеге ресурста 16+ категорияләренә керүче мәгълүмат булырга мөмкин

"ТАТМЕДИА" АҖ филиалы "Татар-информ" мәгълүмат агентлыгының Интертат.ру / Intertat.ru республика электрон газетасы редакциясе".

Адрес: 420066, Казан, Декабристлар ур., 2нче йорт. Телефон: +7 (843) 222-0-999 (1304)
E-mail: info@tatar-inform.tatar

Шәхси мәгълүмат
"ТАТМЕДИА" АҖнең коррупциягә каршы сәясәтен раслау турында
Коррупция фактлары турында хәбәр итү өчен: shamil@tatar-inform.ru

Генераль директор Садыйков Шамил Мөхәммәт улы.
Баш редактор Латыйпов Рәмис Нурмөхәммәт улы.
Шеф-редактор Исмәгыйлева Алсу Җәүдәт кызы

Гаммәви матбугат чарасын теркәү турындагы таныклык Россиянең элемтә, мәгълүмати технологияләр һәм гаммәви коммуникацияләрне күзәтчелек хезмәте тарафыннан 2012 елның 10нчы маенда бирелде. Таныклыкның номеры - ЭЛ № ФС77-49790.
Материалларны тулысынча яки өлешчә куллану бары тик редакциядән язмача рөхсәт булганда гына мөмкин.
"Татмедиа" республика матбугат һәм массакүләм коммуникацияләр агентлыгы ярдәме белән чыгарыла