Мирзаяновлар гаиләсендә кичә бәби чәе булган. Яшь әни Зөлфирә Шәйдуллина-Мирзаянова беренче тапкыр кызы Нәзирәгә багышланган җырын башкарган иде. Ул социаль челтәрдә бу җырның тарихын язган.
«Бала тудыру йортыннан кайтуга, бу җырны миңа Айгөл Вәлиуллина җибәргән иде. Сүзләрен укып бетерә дә алмадым, елап беттем. «Айгөл апа, беркемгә дә бирмәгез! Бу җыр минеке!» – дип яздым. Кичә җырлаган вакытта да бөтен эмоцияләрне «сүндереп» җырларга тырыштым. Алай итмәсәм, беренче җөмләсен дә җырлап чыга алмас идем», – дип язган яшь әни.
Ул җырның кушымтасын да язып куйган.
Һәр кеше дә миндәй сөеп,
Сабыем, дип янып-көеп
Яратадыр баласын.
Без үстергән балаларны,
Аталарны, аналарны
Бәхетле ит, Аллаһым!
Көй авторы – Риваль Хисмәтуллин, аранжировка – Артур Җамалетдинов.
Җанатарлары бу җырны инде яратып та өлгергән. «Хит булачак», – дип фаразлыйлар. Яшь әнигә, Нәзирәгә матур теләкләрен дә язганнар.
«Шундый матур», – дип язган Зәринә Хәсәншина.
«Бик матур булган, елата», – дип язган Энҗе исемле җанатары.
«Бик матур, күз яшьләрсез тыңлап булмый», – дип язган Гөлназ Гатауллина.
Видео Зөлфирә Шәйдуллина-Мирзаянованың социаль челтәрдәге аккаунтыннан.