Зифа Нагаева яңа җыры турында: «Язмышым белән канәгать булу йөзеннән язылды»

Автор-башкаручы Зифа Нагаева «Әлхәмдүлилләһ» дигән яңа җырын тәкъдим итте. Ул аның көен дә, сүзләрен дә үзе иҗат иткән.

«Рамазан аеның беренче көннәреннән үк ураза тотам. Күңел белән хушлану, бик күп гадәтләрдән тыелу, җанны чистарту вакыты хәзер. Әнә шундый уйларым белән йөгерергә чыккан бер иртәдә шушы җыр күңелемә килде. Аллаһка шөкер, әлхәмдүлилләһ, бар да яхшы, дип, Ходай тәгалә биргән шушы көннәргә сөенеп, ихлас күңелдән туган җыр. Сүзләре үзеннән-үзе килде, тезеп кенә куйдым. «Әлхәмдүлилләһ» – Аллаһны мактау дигән сүз бит инде ул. Аллаһы Тәгаләгә рәхмәт, ихтирам, язмышым белән канәгать булу йөзеннән язылды. Бүгенге тормыш авырлыклардан гына тормый бит. Матур бит тормышларыбыз, аны кадерли белсәк иде», – дип сөйләде ул әлеге җыр турында «Интертат» хәбәрчесенә.