Җырчы Зәринә Хәсәншина авылга кайтты исә, социаль челтәрендә әти-әнисе белән кызыклы видеолар көт тә тор. Азакта барыбер егетләр темасы кузгатыла. Ә җырчы бигрәк уңган инде, әнисе белән печәнне дә урнаштырып куя. Әтисе видеога төшереп тора.
«Менә печән өйгән видеоны карадылар да, әни, сиңа комплимент бар: «Сине хатын итеп алырга була икән, нинди әйбәт теща – уңган хатын», – дип язалар. Бу татар егетләренә синең матурлыгың, шәп фотоларың да кирәкми. Менә шундый җен кыяфәтле эшли торган хатын булсын! Берәр матур фото, видео кертәсең – реакция юк. Печән өйгәнне кертәсең – инде кияүгә алырга әзерләр», – дип сөйли җырчы.
«Атаң шундый принцип белән сайлап алгандыр мине», – ди җырчының әнисе.
«Кызлар, күбрәк эшләгәнегезне, ашарга пешергәнегезне социаль челтәргә куегыз. Тикшерелгән лайфхак», – дип киңәш тә бирә җырчы кияү көтүчеләргә.
«Бер яктан әйбәт хатын эзләүләре әйбәт тә инде», – дип нәтиҗә язап куя Зәринә.
«Үзләре эшли микән соң алар?» – дип, уңган әни белән кыз «кияүләр» темасын ябып куйды.