Татарстанның халык артисты Зәйнәб Фәрхетдиновага 55 яшь. Юбилее уңаеннан ул туган ягы Азнакайда «Авыл көе» фестивален уздырды.
Зәйнәб Фәрхетдинова 55 яшьлек гомеренә нәтиҗә ясады. «Бернәрсә дә үзгәрмәде кебек», – диде ул, «яңа яшьтә ничек сезгә?» дигән сорауга.
55 яшь – әле ул бөтенләй карт түгел! 55 яшькә җиткән һәрбер кешене, һәр хатын-кызны юбилейлары белән тәбрик итәм.
Бернәрсә дә үзгәрмәде кебек. Эшләгән эшләргә, җырлаган җырларга, балаларга карагач, байтак гомер үтелгәнен аңлыйсың. Аллага шөкер, матур эшләр эшләнгән. Сәхнәдә, профессиональ юнәлештә дә беркайчан да тыныч торылмаган. Тормышка карата да мөнәсәбәт сүрелмәгән.
Мәхәббәттә дә, Зөфәр белән ничә еллар бергә, Аллага шөкер. Тормышта да, сәхнәдә дә шатлыкларны, кайгыларны бергә бүлешеп яшибез.
Фото: © Энҗе Габдуллина
Бүгенге көнгә җиңел генә киленмәгән. Тормыш тигез генә бармады. Әти-әни янында үсү, әти-әни яныннан чыгып китүләр, үз гаиләңне кору, балалар туу – барысы да үзенчә рәхәт мизгелләр. Әнкәйләрне югалткач, сыну-сыгылулар... Без тормышта бирешмәскә тиеш дип, акылга сеңеп калган инде.
Аллага шөкер, бүгенге көндә исән-сау. Шундый зур хыяллар белән яшибез, – дип сөйләде ул.
Фото: © Энҗе Габдуллина