Юл һәлакәтендә үлгән яшь артист Илшат Агиев истәлегенә видео төшергәннәр
26 мартта кичке җиделәрдә Казан-Оренбург трассасында — республиканың Әлмәт районында юл һәлакәтендә Әлмәт театры артисты Илшат Агиев үлде.
Әлмәт театры мәрхүм артист Илшат Агиев истәлегенә видео төшергән. Илшат Агиев Казан театр училищесында укыган. Ул Татарстанның халык артисты Илдар Хәйруллин курсын тәмамлаган. Аңа 29 яшь иде.
Кадрлар дога уку белән башланып китә. Аннары ул уйнаган спектакльләрдән күренешләр рәте башлана. Аның хатыны белән төшкән сурәтләре дә күрсәтелә.
Ике сәгать ярымлык видеода артистның рольләре белән видеоөземтәләр дә куелган.
«Яшьләр көтәр дибез, яшьләр дә ашыга икән»: театр артисты Илшат Агиев һәлак булды, дип язган идек.
«Бер гаепсез китеп барды… Хатынын үз гәүдәсе белән каплаган булган. Ул хатынын саклаган. Өйләнешкәннәренә 1,5 ел булды. Илшатны алыштырыр артист булмас та инде бүтән. Аны бөтен шәһәр белә иде. Күп санлы халык җыелырга тиеш түгел, дигәч, театрдан озатып та булмады. Карантин да бер афәт булды. Моргтан гына җибәрдек. Хастаханә янына халык барыбер җыелган иде... Әле эшлисе эшләр күп иде. Хуш, Илшат!» — дип сөйләгән иде театр директоры.
Былтыр 21 июньдә Әлмәт театры артисты Илшат Агиев өйләнгән, дип язган идек.