Юл фаҗигасендә һәлак булган Илмар истәлегенә: «Әтиебез беркайчан булмыймени хәзер?..»
19 август көнне гаиләсе янына ашкынган Илмар Исламов якыннары янына кайтып җитә алмый: 30 яшендә аның гомере юл һәлакәтендә өзелә. Тукай районында, М-7 трассасының 1068 нче километрында, Hyundai Solaris машинасында идарәсен югалтып, Илмар юл кырыенда торган DAF йөк машинасына килеп бәрелә. Имгәнүләрдән ул табиблар килгәнче үк җан бирә.

Тормышына кара пәрдә төшсә дә, Гөлия Исламова иренең якты истәлегенә дип, «Интертат»ка хатирәләр белән уртаклашырга үзендә көч тапты.
Илмарның Чаллыдан кайтып барышы була. Соңгы 2,5 елын Чаллыда завод цехы башлыгы вазифасында эшләгән. Ипотека, машина кредитын түлисе, гаиләсен туендырасы да булгач, акчасы да күбрәк булмасмы дип, шулай 2 ел элек калага китәргә тәвәккәлләгән була. Ял көннәрендә Актанышка гаиләсе янына кайтып йөргән. Еш кына, сюрприз булсын дип, якыннарына әйтмичә дә кайтып төшкән. Бу юлы да шулай эшләмәкче булган, күрәсең, бәлки, эштән бушаган вакыты булгандыр, тик «кара сишәмбе» аның гомер юлына нокта куя. Актаныш район үзәгендә яшәүче гаиләгә хәзер әтисез яңа тормышка күнегәсе…
«Чыгып очмасаң, бәрелеп үлмәсәң ярый инде дип, кисәткәнем дә булды»
Чаллыга китеп эшли иде, атна азакларында кайтып йөрде. Кайтасын бик әйтеп йөрми иде шул, сюрприз ясыйсы килде. Хәтта җомга кайтасы булса да, «шимбә кайтам» ди иде.
Ул көнне югары тизлек белән баргандыр инде, шуңа идарәсен югалткан. Яшерен-батырын түгел, тиз йөри иде шул. Чыгып очмасаң, бәрелеп үлмәсәң ярый инде дип, кисәткәнем дә булды, гел шундый фикерләр килә иде. Кызу йөрисең, әкренрәк йөр, дип тә әйтә идем.
Юл һәлакәтеннән соң, миңа төнлә «ВКонтакте» аркылы чыктылар. Анда Илмарны, аның аша мине табып, төнлә миңа шалтыраттылар. Сәгать төнге 2 нче яртылар иде. Чит кеше шалтыраткач, алыргамы-юкмы, дип тә тордым. «Үлгән» диделәр – башта ышанмадым. Аннары таныш-белешләрдән сораштырып, алар барып, дөрес икәнен белдек. Илмарны шунда ук моргка алып киткәннәр, – дип сөйләде Гөлия Исламова.

Фото: © Исламовларның гаилә архивыннан
«Бәлки, мин икенче елга булмам, үләрмен, ди иде»
Илмарга июльдә 30 яшь тулган. Туган көне алдыннан, сизенгән күк, әйткән сүзләре дә булган икән шул…
Без аның туган көнен өйдә туганнарны чакырып уздырдык. Аның, зурлап, кафеда үткәрәсе килә иде – каршы килдем. «Бәлки, мин икенче елга булмам, үләрмен», – ди иде. Үзе сизгән инде ул үләсен, шулай дигәндә, курка идем.
2 балабыз калды. Кызыбыз Эвелина – 3 нче класска, улыбыз Ядкәр быел 1 нче класска бара, ноябрьдә 7 яшь тула аңа. Әтиләре турында хәбәрне мин үзем әйтә дә алмадым. Апалары, «үлгән» дип әйтеп, күңелләрен яраламас өчен, «әтиегезне Аллаһы Тәгалә үзе кырыена алган» дип, йомшаграк итеп әйтергә тырыштылар.
Әтиләрен соңгы юлга озатканда, алар шунда булды. Җирләргә алып киткәндә, кыз кычкырыплар елады, аннары берникадәр вакыттан соң тынычландылар инде. Кызым: «Әни, беләсеңме нигә апаем (кайбер якларда үзләреннән кече туганны «апаем» диләр – «ИТ» искәрмәсе) еламады?» – ди. Малайлар миннән көлмәсен дип, еламады ул», – ди. Тынычлансалар да, барыбер хәзер дә кисәк кенә килеп кочаклап, «әтине сагынам» дип елап җибәрәләр инде. «Әтиебез беркайчан булмыймени хәзер?» – диләр, аңлыйлар инде алар… Улым фотоларын карап, елап та йөри. Шуңа алар кырыенда еламаска, исләренә төшермәскә, күрсәтмәскә дә тырышам инде. Алайса бик борчыла башлыйлар...
Балаларына әйбәт әти булды ул, алар өчен барысын да эшләде. «Әти, әти» дип кенә торалар иде, кайту белән чат ябышалар иде әтиләренә балалар. Читкә китеп эшләгәч, алар әтиләрен эштә дип уйлаган кебек. Мин үзем дә ышана алмыйм әле, миңа да эштәдер кебек… – ди Гөлия.

Фото: © Исламовларның гаилә архивыннан
Алар бергә 9 ел торып калганнар. «27 август көнне генә туебызга 9 ел тулды», – ди ул. Гөлия сүзләренчә, кайчак җитди, кырыс булып күренергә тырышса да, Илмар эчтән йомшак күңелле булган. «Яхшы, мәрхәмәтле күңелле иде ул. Волейбол уйнарга яратты, икебез дә уйный идек. Чаллыга китеп эшли башлагач кына ярышларда катнаша алмый башлады. Ә Актанышта чакта уйнаганда, команда белән Татарстанда беренче урынны алып кайткан да бар иде. Ул үзе – һөнәре буенча физкультура, ОБЖ укытучысы. Актанышта спорт мәктәбендә эшләде. Хезмәт хакы түбән булгач, китеп эшләде инде…» – дип искә алды Гөлия тормыш иптәшен.
Туендыручысыз калган гаилә хәзер ипотекага алынган йорт кредитын да түли. Машина кредиты буенча бурычлары да әле ябылмаган. Өстәвенә, йортларында ремонт, вак-төяк эшләр өчен дә кредит алган булганнар. Уку елы башлануга санаулы көннәр калды. Балаларны мәктәпкә әзерләү чыгымнары да зур бит хәзер. Кредит бурычларын да каплыйсы бар. Ил төкерсә, күл булыр, ди халык. Ике баласы белән тол калган Гөлиягә ярдәм итәргә теләүчеләр өчен, Гөлия Исламованың «Россельхозбанк», «Сбербанк» карталарына беркетелгән телефон номерын калдырабыз: 8-908-332-13-54 (Исламова Гулия Салаватовна).
«Интертат» редакциясе коллективы Илмар Исламовның әти-әнисе, хәләл җефете Гөлия, балалары, туганнары, якыннарының тирән кайгысын уртаклаша. Бу язма аның рухына дога булып барып ирешсен! Илмарның авыр туфрагы җиңел булсын! Урыны оҗмах түрләрендә булсын!
Җырларда җырланганча, «юллар, юллар, авыр булса булсын, тик соңгысы гына булмасын»… Һәммәбезгә өйләребезгә кайтып җитәргә насыйп әйләсен!
Фотоларны «Интертат»ка Гөлия Исламова җибәрде