Җырчы Ришат Фазлыйәхмәтовның хатыны Эльмира яки, Ришатча итеп әйткәндә, Тәтишка көтелмәгән сюрпризлар ясарга ярата. «УНИКС»та узган туган көн концертында да тормыш иптәше җырчыга көтелмәгән бүләк ясаган – гармун бүләк иткән.
«Тәтишкә! Хыяллар чынга аша. Хатын шаккатыра белә инде минем. Башта «бүләксез калдым» дип шаккаттым, аннары – бүләкнең үзеннән.
Бу постны да соңлап кына куям, чөнки буш вакыт килеп чыгу белән шыңгыр-мыңгыр гармун тартам, түзсен генә күршеләр. Үз бүләге булгач, Тәтишка да сүз әйтә алмый. Шунысы кызык, ул аны аңлап бүләк иттеме икән?
Ярар, бераз шомаргач, минем йорт яныннан узып барганда «Бу моң кайдан агыла икән?» дип гаҗәпләнмәгез. Ул мин булырмын», – дип язган Ришат социаль челтәрләрдә.
Эльмира үзе «Интертат»ка Ришатны туган көнендә бүләксез калдыруы, зур сюрпризны концерт барышында ясарга җыенуы хакында сөйләгән иде.
«Бу видеоны елап карадым. Бер-берегезгә терәк булып, бер-берегезгә кирәк булып, алдагы көндә дә тиңлектә, тигезлектә, тиң мәхәббәт белән яшәгез», «Шәп бүләк», – дип сөенгән тамашачылары да яшь пар өчен. Җырчы Лилия Хәйруллина Ришатны: «Синең хатының бик шәп», – дигән комментарие белән үсендергән.
Тәтишканың сәхнәгә спорт киеменнән чыгуына игътибар итүчеләр дә табылган. «Матур итеп киенә генә белмәгән», – дип язып калдырган бер ачы теллесе.