Татар эстрадасы җырчысы Ильвина социаль челтәрдә сөйгән ярын күрсәтте. Моңа кадәр ул туры эфирларда ниндидер Булат исемле кешене генә еш телгә ала иде. Күптән түгел Ильвина чит илгә ял итәргә кызы һәм сөйгән яры белән барган.
Бер фотода аның кызы бер ир-егет белән ресторанда утыра, икенчесендә – яр буенда йөри, өченче фотода Ильвина шул ир-егет белән кочаклашып, кояш баешын күзәтә. Фотоларда ир-атның йөзе күренмәсә дә, аның буй-сынын абайлап алырга була.
Моңа кадәр Ильвина, 2022 елның көзендә, сөйгәненең җилкәсен генә күрсәтеп, бергә 7 ел яшәүләре турында язган иде. Ул вакытта да җырчы гаилә хәлен ачык итеп язмады. Бары тик ирен – атом, үзен – электрон дип атап, «атом белән электрон» мәхәббәте хакында уйлануларын бәян иткән иде.
Искәртеп үтәбез, Ильвина интервьюларының берсендә 20 яшьтә кияүгә чыгуын, кызына 4 яшь чакта иреннән аерылуын сөйләгән иде. Икенче тапкыр рәсми рәвештә кияүгә чыгуы турында ул хәбәр итмәде.