Йомырка агыннан крем (рецепт)
Сезгә йомырка агыннан искиткеч тәмле һәм рәсемнәр ясарлык тотрыклы крем рецептын тәкъдим итәм. Ялларда якыннарыгызны торт яки башка татлы ризыклар пешереп сыйларга җыенасыз икән, менә бу крем нәкъ сезнең өчен.
Крем өчен: 2 йомырка агы, 120 грамм шикәр комы, 33 грамм су, пычак очында лимон кислотасы, 3 грамм ванилин.
Йомырканың агын аерып алып чиста һәм коры савытка салырга һәм 5-6 тапкыр артканчы миксер белән тугларга.
Шикәр комы белән суны кушарга, кайнатып чыгарырга, күбеген җыярга. Сиропның әзерлеген салкын суга бер тамчы сиропны салып тикшерәбез. Әгәр ул таралмаса, шарсыман җыелса, әзер дигән сүз.
Йомырка агын туглаудан туктамыйча, әкренләп кайнар шикәр сиробын кушарга. Массага лимон кислотасы, ванилин өстәргә. Кремны тагын 10 минут тугларга.
Татлы ризыкларны бизәү өчен шәп крем килеп чыга.