Әнвәр Нургалиевның Дүртөйледә узган концертына Украинадан 2 атналык ялга кайткан җырчы Артур Хәсәнов та килгән.
Башкортстанның Илеш районы егете Артур Хәсәнов, мобилизациягә эләккәч, Филүс Каһиров репертуарыннан «Киек каз юллары» җырын искиткеч моңлы башкарып, интернетта танылган иде.
«Беләсезме кем килде, дуслар, безнең янга кунакка? Артур «Киек казлар»! Филүснең алмашчысы. Артур Каһиров», – дип шатланган Әнвәр Нургалиев.
«Хәсәнов инде, Әнвәр абый, Хәсәнов», – дип тыйнак кына төзәтә Артур үзләрен видеога төшереп торучы Әнвәр Нургалиевны.
«Сине күрүемә бик шат! Хөрмәт итәм. Бүген концертта азрак ял ит, «кайфани», – дип озаткан аны тамаша залына Әнвәр Нургалиев.
Артур «Интертат»ка интервьюда җырчылардан Филүс Каһиров, Әнвәр Нургалиев, Айдар Галимов белән даими элемтәдә торуы хакында сөйләгән иде.