«Ябык табутта җирләдек». Троллейбус таптаган үсмер кызның мәетен өлешләп җыйганнар

Краснодарда 15 яшьлек В. фаҗигале үлгәннән соң 3 ел узган. Троллейбус йөртүчесе җәяүлеләр кичүеннән чыгып баручы кызны үткәрми, кыз троллейбус тәгәрмәчләре астында калып һәлак була. Бу хакта «Комсомольская правда» яза.

Кызының үлеменнән соң 3 ел узгач, әтисе шул көндәге коточкыч вакыйгаларны искә төшерә. «Кызым, син мине ишетәсеңме?» – дип кычкырдым. Ә анда – асфальтта – баш мие һәм йөзе аерым! Без балабызның бүтән булмавын аңладык!» – дип сөйли ул.

Фаҗига урынына тиз арада полиция һәм «ашыгыч ярдәм» килә. Ләкин кызның инде сулышсыз гәүдәсен алу өчен, махсус транспорт чакыртырга һәм күп тонналы машинаны күтәрергә туры килә.

Баланы ябык табутта җирләгәннәр. Аның мәетен өлешләп җыйганнар. Бу күренеш әле дә әти-әнисе күз алдында тора, диелә хәбәрдә.

Машина йөртүче гаепле дип табылган һәм 2 елга төрмәгә утыртылган. Бу вакыт эчендә ул кыз бала гаиләсенә компенсация сыйфатында 110 мең сум акча түләгән, дип хәбәр ителә.

Әмма кызның әти-әнисе аңа бирелгән җәзадан канәгать түгел. «Бездән гафу үтенүче дә булмады», – ди кызның әтисе.

Суд кызның әти-әнисенең һәркайсына 1,8 млн сум күләмендә компенсация түләргә карар чыгара. Әмма кассациядә сумманы 1 млн сумга кадәр киметәләр. Хәзер алар Краснодар трамвай-троллейбус идарәсеннән, мораль зыянны каплау өчен, 20 млн сум таләп итәргә җыена, диелә хәбәрдә.