Йөкле Лилия Муллагалиева бала көткән вакытта шөгыль тапкан
Тиздән Татарстан Республикасының атказанган артисты, җырчы Лилия Муллагалиеваның "Мин" дип исемләнгән яңа китабы чыга. Тамашачыларга ул аны сентябрь аенда, үзенең концертларында бүләк итәчәк.
Лилия Муллагалиеваның дүртенче баласын көтүен язган идек. Ул тик кенә ятмый, китап яза икән!
- Лилия, китап чыгару идеясе кайчан, ничек туды?
- Үземнең китабымны чыгару, күптәңге хыялым. Читтә яшәүче милләттәшләребез минем җырларны башкара, Сабан туй бәйрәмнәрендә ишеткәнем булды. Ләкин алар күп җырларның көйләрен мин иҗат иткәнне белмиләр, шуңа күрә популяр җырларымны халык күңелендә калдырасым килде. “Мин” китабы үзем иҗат иткән җырлардан тора. Яңа китапка барлыгы 50 җыр кергән, анда җырларның ноталары һәм текстлары да язылган. Шулай ук сүз авторларының фотосүрәтләрен, биографиясен урнаштырдым. Китап сату өчен түгел, мин аны концертымны карарга килгән тамашачыларга бүләк итәчәкмен. Бик тиз, бер ай эчендә китап әзер булды. Композитор, бик күп җырлар авторы Риф абый Гатауллин ярдәм итте.