Хәрби өйрәнүләр вакытында «Киек каз юллары» җырын башкарып танылган Артур Хәсәновның кыска вакытлы ялга кайтуын хәбәр иткән идек. Хәрбине Казанның «Пирамида» залында узган «Халык җәүһәрләре» фестивалендә катнашу өчен чакырганнар икән. Бу хакта фондның социаль челтәрдәге сәхифәсендә язалар.
«Артур кайтты! Халык мәхәббәтен яулап алган Артур Хәснов «Киек каз юллары» җыры белән «Халык җәүһәрләре» гала-концертында чыгыш ясап, конкурсның лауреаты булды. Исән-сау әйләнеп кайт, Артур», – диелә анда.
Үзенең хит җырын башкарган Артурны тамаша залындагы халык басып алкышлаган.
Халык бу чарада Артурны көтмәгән булган. Алар комментарийларда җырчы егетнең сәхнәгә килеп чыгуы искиткеч зур сюрприз булуы турында язалар.
«Безнең геройларыбыз гимны. Артурга да, башкаларга да сау-сәламәт булып, өйләренә әйләнеп кайтуларын телибез»;
«Бу җырны синең башкаруда бик яратабыз. Исән-сау гына бул, балакаем», – дип, матур теләкләрен юллыйлар видео янында.