Владлен Татарскийның әнисе Равилә ханым улын үтерүчеләрне кичерүен әйткән
Террор актында һәлак булган военкор Владлен Татарскийны Мәскәүнең Троекуров зиратында җирләделәр.
Военкор Владлен Татарскийның (чын исеме Максим Фомин) әнисе Равилә ханым Дарья Трепованы кичерүен әйткән. Кыз 2 апрель кичендә Владлен Татарскийның Санкт-Петербургның Университет ярындагы кафеда узган кичәсенә эченә шартлаткыч урнаштырылган статуэтка тотып керә. Шартлау нәтиҗәсендә военкор һәлак була, 15 кеше яралана. Дарья Трепова кулга алына. Террор акты ясауда һәм шартлаткыч матдәләр сатуда гаепләнеп, кыз 2 июньгә кадәр кулга алынды.
Фото: © Shot телеграм каналы
«Әйе, мин аларның барысын да кичерәм, Ходай аңласын. Ул (Владлен турында) пост тотты, дога кылды. Ул күктә дә көрәшер өчен, анда сугышчы булып китте», – дигән Равилә Ибрагимовна Shot Telegram каналына.
Фото: © Shot телеграм каналы. Фотода шикләнелүче Дарья Трепова
Хәрби журналист Владлен Татарскийны 8 апрель көнне Мәскәүнең Троекуров зиратына җирләделәр.
Владлен Татарский үзенең нәселендә татарлар булуын әйткән иде, әмма әнисенең татар исемле булуын әйтмәде. «Телеграм» канал хәбәреннән аңлашылганча, аның әнисе дә татар булган. Владлен Татарский – махсус хәрби конфликт вакытындагы иң популяр блогерлардан: аның каналына ярты миллион кеше язылган иде.