Татарстанның атказанган артисты Вадим Захаров «ТМТВ» телеканалындагы «Сөйләшергә кирәк» тапшыруында әнисен югалтканнан соң хис-кичерешләрен, ялгызы калган әтисенең ничек яшәвен сөйләгән.
Лилия, бу турыда сөйләве бик авыр. Шуңа күрә интервьюлар да бирәсе килми инде минем хәзер. Әни үлеп ярты сәгать узуга, журналистлар шалтырата башлады. Миңа бик авыр булды ул журналистның шул вакытта: «Әниегез белән мөнәсәбәтләрегез нинди иде?» – дип сорау бирүләре. Җавап бирмәдем, җавап бирерлек халәттә дә түгел идем.
Мескенләнеп тә йөрмәдем мин. Бу – гомерлеккә күңелдә һәм гомергә минем белән барачак төер инде. Күзне ачсам да, күзне йомсам да янымда сыман.
Кемгәдер әйтеп, мескенләнеп йөрүне кирәк дип тапмадым. Миңа гына килә торган хәсрәт түгел, һәр кешегә дә килә торган әйбер, дип тынычландырдым үземне. Вакытыннан алда гына китеп бармасыннар….
Әтиегез?
Әти авылда. Әле безнең әби бар бит. Әтинең әнисенә 93 яшь тула. Икесе яшәп яталар. Авылга кайтып йөрибез. Мин бит инде гел юлда. Узганда да авылга кермичә үткән юк, – дигән ул.