Дагыстанда төшерелгән бу видеоны караганда ук куркыныч: тимер юлдан ак күлмәкле кыз бара, поезд якынлаша, кычкырган тавыш ишетелә… Кыз түгел – ул колакчыннарын киеп, күңеленә хуш музыка тыңлап, рельслардан бара, кабинасындагы машинист кычкыра. Нишләргә белмәгән чарасызлыктан, гаҗизлектән кычкыра машинист. Ә кыз исә бу дөньядан аерылган, ул үз дөньясында.
Аннары поезд бәрдергән тонык тавыш... рельсларын чинатып, поезд туктый.
Поезд Махачкаладан Дербантка барган, фаҗига исә Мамедкала дигән бистәдә була. Кыз шунда яшәгән. Бистә аша тимер юл уза, анда даими поездлар йөреп тора. Ни өчен кыз игътибарсыз булган – анысын инде белеп булмый, ул, билгеле, шунда ук һәлак була.
Җинаять эше кузгатылган, беренчел фаразлар буенча, машинистның гаебе юк. Кыз тиешле булмаган урыннан чыккан, ул сигнал биргән, әмма барган поездны туктату мөмкин түгел – ул 1 секундка 20 метр тирәсе бара, һәм аның тормоз юлы 1 километр тирәсе тәшкил итә.
Полиция тимер юлның куркыныч урын булуын кисәтә. Тимер юлдан чыкканда телефонга карарга ярамый, колакчыннарны, капюшонны салырга кирәк. Гомумән, тиешле булмаган урыннардан тимер юл аша чыгарга ярамый.
Татарстанда апрель башында гына пассажирлар утырткан автомобиль тимер юлга кергән иде, ике егет һәлак булды. «Интертат» Коркачык тимер юл станциясендәге куркыныч вәзгыять турында язган иде.