Чаллыда улы пычак белән кадап яраланган хатын реанимациядә ята, аңа җитди операция ясаганнар. Бу турыда «Челнинские известия» хәбәр итте.
Табиблар инде бишенче көн рәттән 61 яшьлек хатынның гомерен саклап калырга тырыша. Табиблар аның терелүенә өметләнә. Яраланган хатын гомер буена шәһәрдәге медицина оешмаларының берсендә табиб-терапевт булып эшләгән.
Алдарак билгеле булганча, канлы фаҗига 3 августта Чаллыдагы фатирларның берсендә була. Биредә әти кеше – «Камаз» топ-менеджеры, 62 яшьлек Валерий Адаричев һәлак була, аңа улы пычак кадый. Аны шимбә көнне җирләделәр.
Улы әтисен үтереп ятканда, өйгә әниләре кайта. Егет әнисенә дә пычак кадый. Аннары ул анасын хастаханәгә китерә, үзе качып китмәкче була, тик аны ЮХИДИ тоткарлый. Машина салонында канлы әйберләр, 400 мең сум акча салынган сумка була. Егет акчаны атасының банк картасыннан алган. Хәзер аны тоткарлап, 4 ноябрьгә кадәр СИЗОга озаттылар.
- «Рубин»да уйнаган футболчы егет әтисен – «КамАЗ» топ-менеджерын үтергән, дип шикләнәләр, дип язган идек.