«Ул җеннәрне дә биетер» — Гүзәл Уразова Корея кунакларын татарча биеткән
Мунгем белән Таля әллә ни арада татарча бию хәрәкәтләрен өйрәнеп өлгергән.
Челтәрле «бизнесмен» җырчылар бер-берсеннән калышмый. Шушы көннәрдә генә бер компания «челтрәвик»ләренең «Казан Экспо» ны тутырып концерт оештырулары турында язган идек. Җырчы Гүзәл Уразова командасы да Яңа ел бәйрәме уздырган. Әлеге чарада Гүзәл Кореядан килгән кунакларны татарча биеткән. Мунгем әфәнде белән Таля ханым татарча бию хәрәкәтләрен кай арада өйрәнеп өлгерделәр икән? Инстачылар фикеренчә, Корея кунаклары чын татарлар кебек шәп бии. «Болар алдан әзерләнгән кебек», «Бик яхшы килеп чыга», — дип мактаганнар биючеләрне.
Ә менә чын татар Гүзәл Уразованың татарча биюен ошатмаучылар табылган.
«Татарча бии белмисез», «Җырчы буларак сез супер, әмма бию юк икән сездән» — дип язганнар аңа.
«Сез үзегез белмисез, каткан аяклар», — дип шунда ук яклап чыгучылары да булган.
«Безнең Гүзәлнең белмәгән эше юк», «Гүзәл ул җеннәрне дә биетер», — дип тә мактаганнар җырчыны.