Укучыларны «Я – русский» дип җырлаткан видео турында җырчылар: «Барып чыгабыз бугай»

Интернетта мәктәп укучыларын «Я – русский» җырына кул күтәрергә мәҗбүр иткән видео турында татар эстрадасы җырчысы Зәринә Хәсәншина үз фикерен белдергән. 

«Шаккатмалы!  Мине бу тема борчый. Бик күп татар танышларымның балалары бары тик рус телендә генә сөйләшәләр. Аларның балалары белән нәрсә булыр? Нигә беркемне дә халкыбызның, туган телебезнең киләчәге борчымый? Сезгә барыбермени?

«Алар бит үзләре өйрәнә, берни эшләтә алмыйм», – дисез. Ә нигә алайса Ландыш Нигъмәтҗанованың бөтен баласы да татарча сөйләшә, алар бит рус телен шул ук дәрәҗәдә яхшы белә. Өйрәнгәннәр, өйрәткәннәр бит. Үзебездән генә тора бит барысы да. Нигә руслар үз халкын яклый, ә без юк?» – дип язган ул сторисларында.

Зәринә, туган телне саклауның уңай мисалы итеп, балалары белән чиста башкорт телендә аралашучы Таиповлар гаиләсен китергән. «Менә бу башкорт гаиләсенә сокланам. Баш иям мин андый гаиләләр алдында», – дигән ул.

Җырчы Алинә Сафиуллина да видеоны сторисларына күчереп куеп: «Барып чыгабыз бугай», – дип язган.

Видеролик кичә социаль челтәрләрдә таралды. Анда бер ханым укучыларны чарага әзерләү кысаларында  Шаманның «Я – русский» җырына укучыларга кулларын күтәрергә һәм «Я – русский» дип кабатларга куша. 

• «Кем патриот түгел – читкә китегез» яки ни өчен балаларны «Я – русский» дип җырлатканнар?

• Рамил Төхвәтуллин укучыларга «Я – русский» дип кычкырырга кушу фактын тикшерүне сорый