Украина хәрби көчләренең пилотсыз очкычлары кабат Мәскәү һәм Мәскәү өлкәсенә һөҗүм итте. Дроннарның берсе кабат «Мәскәү-Сити» комплексындагы бинага бәрелеп шартлаган.
Бу хакта Оборона министрлыгы һәм Мәскәү мэры Сергей Собянин хәбәр итте.
30 июльдә бу бинага дроннар һөҗүм иткән иде инде. Ул көнне Кырымга да 25 дрон һөҗүм итте.
Ике дрон Одинцово һәм Нарофомин районнарда бәреп төшерелгән, дип хәбәр итә министрлык. Бер дрон, радиоэлектрон каршылык чаралары куллану нәтиҗәсендә, идарәсен югалтып, «Мәскәү-Сити»га төште, диелә.
Собянин барлык пилотсыз очкычлар да юкка чыгарылды, ди, әмма бер дрон барыбер «Мәскәү-Сити»га бәрелеп шартлаган. Нәтиҗәдә 21 каттагы фасад җимерелгән, 150 квадрат метрда пыяла ватылган. Бу катта Россия Икътисади үсеш министрлыгы урнашкан.
Дроннар һөҗүме вакытында Внуково аэропорты ябылып торган.
Мәскәүгә 24, 28 июль көннәрендә дроннар һөҗүм иткән иде.
Дрон бәрелеп шартлаган мизгел бүлмә эчендәге видеокамерага эләккән.